Morgan Wallen ‘Last Night’ a Hot ber

Morgan Wallen ‘Last Night’ a Hot ber
Morgan Wallen hla hit ‘Last Night’ chu Billboard Hot 100 (singles) chart-ah a No.1 a, a zawn ni kher lovin he chart-ah hian kar hnih a No.1 tling ta a, 1975 hnuah mipa zaithiam, midang zaipui miah lova Hot 100 leh Hot Country Songs-a kar khat aia tam No.1 leh thei hmasa ber a ni. He hla hi kar li kalta khan chart No.1 a kai a, Morgan Wallen tan he chart-a a hla No.1 kai thei hmasa ber niin, a hla hi a album ‘One Thing at a Time’ atanga a single niin, a album pawh hi kar nga chhung Billboard 200 (albums) chart-ah a No.1 tawh bawk a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Last Night hi kar khat chhungin stream maktaduai 35.1 leh download sales 10,000 a la tling a, hei bakah hian radio airplay-ah pawh ngaithlatu maktaduai 29.7 nei angin an chhut a, hei hi chart-ah a No.1 pui leh ta a ni.
SZA ‘Kill Bill’ chu No.4 atangin No.2 a kai thar leh a, heti hian a zawn ni kher lovin kar riat a No.2 ta a, chart No.1 hlui Miley Cyrus ‘Flowers’ chu No.2 atangin No.3-ah a tawlh a, Metro Boomin, The Weeknd leh 21 Savage “Creepin'” chu No.5 atangin No.4 a kai thar leh a, chart No.1 hlui The Weeknd leh Ariana Grande ‘Die for You’ chu No.6 atangin No.5 a kai thar ve leh ta bawk.
PinkPantheress leh Ice Spice ‘Boy’s a Liar, Pt.2’ pawh No.7 atangin No.6 a kai thar leh a, Rema leh Selena Gomez ‘Calm Down’ chu No.8 atangin No.7-ah a insawn a, chart No.1 hlui Taylor Swift ‘Anti-Hero’ chu No.9 atangin No.8-ah a insawn thar leh a, Coi Leray ‘Players’ pawh No.10 atangin No.9 a kai thar ve leh ta bawk.
Chart top 10 khartu chu Bailey Zimmerman ‘Rock and a Hard Place’ niin, No.13 atangin No.10-ah a invawrh a, he chart-a a tawn san ber a la ni.