A hnai tual tual, Pu Duha mawlh hi !!

By: Rosangzela, Vh – 8974138026
Bawi chhuakin a Pu a hlap :
Ram Rorelna in sang, Legislator te rorelna hmun Assembly House-a Dampa bialtu Pu Lalrintluanga Sailo “Min Surprised-a” chevel kha mipuiin kan ngaihven a. Social media hrang hrangah beihna, nuihzatna, hmuhsitna, deusawhna hmuh tur a tlep tiarh tuarh a. Kum 2018-ah khan Dampa bial chhunga voters 5840 zetin MLA atan an vawrh tling a, a hnaih bertu pawh vote 1657 zetin a rap bet a ni. A sorkar tawngkam takin, Pu Lalrintluanga Sailo hi Deputy Govt, Chief Whip Govt. of Mizoram a ni a; heng a nihna saptawnga inziak zawng zawng hi sawichhuak thei lo kan tam ang. A chanvo Chief Whip hnathawh tur chu laikung bel rawh an tih ang deuhin, a hmuh dan a fiah lovin a phe hlerh hlerh niin a hriat. Mahni pawl te humhim tumin a che na viau mai a, mimal inbeihna pawh a uar na rawh e. A MLA pui ten an bawl chiam nge an hiat kual vel, engpawhnise Sailova tluk zetin lar khat chuan a lar ve ta reng reng mai. Khatia CM leh RRR thlavang a hauh chiam kha a demawm loh, whip a nihna anga a tihtur chin a awm tlat a ni. Assembly House-a MNF lam mit ti khamtu chu Serchhip bialtu niin, na taka beih kha an agenda niin a hriat. Mahse, a buaithlak ta chu Pu Duha an beihna khan MNF Hero chu ZPM Leader a nih thu ram mipuiah an tarlang ta mai kha a ni.
Pu Lalrintluanga Sailo hian Kum1993 MLA inthlan khan, inthlan puan a nih atanga result puan thlengin Bilkhawthlir bialah Pu Lalduhawma a zui thu a sawi a, vote 3109 chu a zuk hmuhpui a ni, hetiang teh hrepa inzui tawh chuan Pu Duha hi a x-ray hneh hle turah ngai ila. Vawiin nia rinawm taka min zuitute hian rei lo teah min chirh theh hrep ang tih a hlauhawm, chuvangin zuitu neih fimkhur a ngai khawp mai. Pu Duha hi amah zuitute zing atangin vaw lettu a tawng fo, IPS lo ni tawh National Police Academy atanga training chhuak a nih miau avangin “I thisen zawmpui te pawh ram hmelma an ni thei, tumah ring suh” tih hi amahah a la bet nghet tlat a, amah zuitu hnai apiang a ring zo lo chu a ni ber mai. Hei hi tunhma atanga Pu Duha ze nghet a ni, chuvangin mi tangkai tak tak a hloh fo a ni. ZPM Collective Leader huangah hian darh huk a thlen ang tih a hlauhawm, hei hi mi thil chikmite thlir dan a ni. Mahse, puitling takin House-a an beihna a ei niin mipuiin kan hria, chuvangin hruaitu rintlakah kan rin lut ta hmiah mai. Bawi chhuakin a pu hlui a hlap tuihnai ta zawk a ni.
Pu Duha leh boruak : Leadership Deficit?
Political Orator tha mi Pu Duha hi boruak ri deuh hulh siam thiam a ni a, Party hruaitu zingah thalai hmangthiam ber a ni awm e. Inthlan kumah reng reng a awmna Party apiang a chawk nung thiam viau a, kum 2013 MLA inthlanah khan ZNP boruak kha a lian khawp mai; ZNP chhungah mal din leh thawhpui neih inbukna a lian viau. Chutah, lian riaua inhriatna a kal vung a, mal din turin inthlan an hmachhawn ta kha a ni a. Kum 2013 inthlan hma khan mipui zingah tunge CM atan i duh ber tih kha zawhna leng vel a ni a, chuta chhanna langsar ber chu CM atan Pu Lalduhawma ka duh ber tih a ni. Aizawl khawpui chhunga rally neih te kha ZNP tan chuan hawi vah na tham a ni, tun tum chu ZNP an sawrkar loh pawhin sawrkarah chuan an tel ngei ang tiin thu leng vel pawh a darh nasa hle. ZNP lama mi Senior te phei chuan khati khawpa Party boruak han vung chho kha la hmu ngai hek lo, an titi pawh a zangkhai khawp mai. Kum 2013 kum tawp lam khan ZNP Office leng lo khawpin thusawi ngaithlatu an awm a, office kawt lama step chhoah pawh an thu hmur a ni. Khatiang boruakah kha chuan sawrkar loh pawhin sawrkar siamtu zingah tel ve ngei rinna a lian hle.
Mahse tih hi Pu Duha political carrier ah hian a awm leh thin, boruak vaw hot-tu ber a nih rualin boruak vawchhetu a ni leh thin hi a ni. Kumin kan inthlang tur hian thu leh hla a ngah chak hle a, thla 7 tha lam la awmah hian Zoram Politics vir vel dan hi a danglam thei. Tun dinhmunah ZPM boruak a lian hle tih mipuiin kan hria, Lunglei lamin nasa takin an rawn vawrh bawk a. Vantlang titi ah ZPM hian mark a hmu sang hle, Mount Everest tlangchhip chuangkai tura fimkhur a ngaihzia leh boruak tha mamawhna a san chhoh dan an sawi thin. ZPM hian a chhip thleng turin ni tam tak a la mamawh, Political analysis te chuan ZPM chhungkua an ngaihven hle. Pu Duha hian comment dan duhawm lo deuh a neih thar chu, “CM kalin a kal leh der tawh” tih hi a ni; hei hi Political Jokes mah nise, mipui rilru vawchhe thei a ni. Boruak kal vung hlurh hlurh hi amah Pu Duha hian a hnukhniam ang tih a hlauhawm khawp mai, chuvangin chan loh khanah Election result a chhuak keuh ang tih hi ZPM tan thlir hmaih chi a ni lo. Mipui rinkai ZPM hian chhungkaw hrisel mamawhna a nei thuk ta hle.
Pu Duha leh Thu ho ber :
MLA ni tur hian kawng thuitak zawh tur a awm a, Minister meuh han ni tur chuan Party President lehkhabu ah “good” hmuh a ngai, Pu Hawla Good Book tih ang deuh khan. Hetiang taka duhsakna dawngtu, Pu Rama Good Book-a chuang Sport Minister-in Assembly House zahawm takah “ek a cheh a, a ek a ei te min ti a” tih thu a sawi chhuak hep mai a, a hria apiang an nui dir char char mai. Khua hi a va var lo tehlul, khawi State ah mah Sport Minister ek ei leh ei lovah inchirthehna a awm lovang. He thu hi Mizoram State Legislative Assembly House a thu ho ber a ni ngei ang, a la ni zel ang. Heng thu ho tak tak lo chhuahna chhan ni a lang chu, sawrkar laiin a mimal taka Pu Duha an beihna kal zel atangin a ni a. Assembly House boruak mipui ngaihven tak chu thinrim urin fiamthu nen kan thlir liam a nih kha. Thu ho ber Sport Minister kal tlanga Zoram mipuiin kan nuihpui kha ZPM Leader Pu Duha tan Pu Rama tawngkam takin “a advantage” a ni ta daih mai. Mizo hi tapchhak zawla titi nuam ti mi kan ni a, titi a distinction nihna hauhtu tan pawh mipui titi hian ZPM a awn tih hriatthiam a tul mang e.