Morgan Wallen ‘Last Night’ a la Hot ber

Morgan Wallen hla hit, Billboard Hot 100 chart-ah a hla No.1 kai thei hmasa ber ‘Last Night’ chu he chart-ah hian No.1 lehin, kar 13 a No.1 tling ta a, he chart-a kar 13 chin No.1 thei hi hla dang 13 chiah a la awm a, ‘Last Night’ hi a 14-na a ni. Hetihrual hian Nicki Minaj leh Ice Spice leh Aqua ‘Barbie World’ chu top 10-ah a debut bawk.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official qudio leh official video), radio airplay leh sales data te chu tehna pawimawh a ni.
Wallen ‘Last Night’ hian kar khat chhungin radio airplay-ah ngaithlatu maktaduai 72.9 leh download sales 8,000 bakah stream maktaduai 29.6 a la nei thei a, hei hi chart-ah a kar 13 nan a No.1 pui leh ta a ni. He hla hi a No.1 album ‘One Thing at a Time’ atanga a single a, a album pawh hi Billboard 200 (albums) chart-ah kar 15 a No.1 tling tawh a, Billboard 200 leh Hot 100 chart-ah a ruala a No.1 hi kar 11 a tling tawh a, heng chart pahniha a ruala kar 11 chin No.1 ni thei pathumna a ni a, mipa solo artist-ah phei chuan hetiang tithei hi midang an la awm lo.
Luke Comb-a’n Tracy Chapman hla hlui ‘Fast Car’ a cover chu No.2-ah bawk a la awm a, tihian chart No.1 leh No.2 hi country hla ve ve a ni a, kar kalta khan No.1 leh No.2 an ni ve ve tawh a, tihian kar hnih chhung Billboard Hot 100 chart No.1 leh No.2-ah country hla a awm dun a, March 1981 hnua hetiang hi a thlen lehna hmasa ber a ni.
Rema leh Selena Gomez ‘Calm Down’ chu No.3-ah bawk a la awm a, chart No.1 hlui Miley Cyrus ‘Flowers’ pawh No.4-ah bawk a la awm a, Lil Durk ‘ALl My Life’ featuring J Cole pawh top 5 khartu niin No.5-ah bawk a la awm a, Toosii ‘Favorite Song’ pawh No.6-ah bawk a la awm.
Nicki Minaj leh Ice Spice leh Aqua te ‘Barbie World’ chuan stream maktaduai 16.2 leh download sales 37,000 neiin, radio airplay-ah ngaithlatu maktaduai 4.7 a nei bawk a, hei hi chart No.7-ah a rawn debut pui. Nicki Minaj tan he chart top 10-a lang thei hla 23 a neihna niin, hmeichhe rapper zinga he chart-a top 10 kai thei hla ngah ber a nihna a sawhnghet leh sauh. Rapper chauh ni loah chuan Whitney Houston nih rualin he chart-a hmeichhe zaithiam zinga top 10 kai thei hla ngahah parukna a ni. Hmeichhe zaithiam zinga Hot 100 chart top 10-a lang thei hla ngah ber chu Taylor Swift niin, hla 40 a nei tawh a, Madonna (38), Rihanna (32), Mariah Carey (28) leh Janet Jackson (27) ten dawn dawt.
Ice Spice tan chuan Hot 100 chatrt-a top 10 kai thei hla pali a neihna niin, Minaj nen an zai dunna hla top 10 kai thei pahnihna a ni bawk.
Aqua tan pawh he chart top 10-a lang thei hla pahnihna an neihna niin, 1997 khan an hla ‘Barbie Girl’ chu No.7 lo kai tawh a, kum 25, thla kua leh kar thum hnuah top 10-ah a rawn lang thar leh ta a, tun kum 59 chhunga he chart-a top 10-a inlan kar hlat ber an la ni. ‘Barbie World’ hla hi film tlangzarh thar tur ‘Barbie’ soundtrack a ni.
Taylor Swift ‘Karma’ featuring Ice Spice chu No.7 atangin No.8-ah a tawlh a, chart No.1 hlui SZA ‘Kill Bill’ chu No.8 atangin No.9-ah a tawlh a, Metro Boomin, The Weeknd leh 21 Savage “Creepin'” chu No.9 atangin No.10-ah a tawlh ta bawk.