Morgan Wallen ‘Last Night’ a la Hot ber
Morgan Wallen hla hit ‘Last Night’ chu Billboard Hot 100 (singles) chart-ah a No.1 a, he chart-a kar 16 a No.1-na a ni ta a, he chart-a hla No.1 ni rei thei ber dawttu niin, mahni chauha zai (non-collaboration)-ah chuan he chart-a No.1 ni rei thei ber a ni ta. Hetihrual hian SZA ‘Snooze’ pawh top 10-ah a lang ve ta bawk.
Billboard Hot 100 hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Morgan Wallen ‘Last Night’ hian radio airplay-ah ngaithlatu maktaduai 59.6 leh stream maktaduai 26.3 bakah download sales 5,000 neiin, chart-ah a No.1 a, tihian Harry Styles hla ‘As It Was’ nen he chart-a kar 15 ve ve No.1 ni thei a, he chart-a No.1 ni rei thei ber pathumna an nihnaah Harry Styles hi a kalsanin, Luis Fonsi leh Daddy Yankee ‘Despacito’ featuring Justin Bieber leh Mariah Carey leh Boyz II Men ‘One Sweet Day’ te nih rualin kar 16 a No.1 ve ta a ni.
Billboard Hot 100 chart-a No.1 ni rei thei ber hla chu Lil Nas X ‘Old Town Road’ featuring Billy Ray Cyrus niin, kar 19 a No.1 a, mahse, he hla hi zaithiam pahnih Lil Nas X leh Billy Ray Cyrus te thawh dunna a ni a, Morgan Wallen ‘Last Night’ hlaah hi chuan amah chauhin a zai ve thung a, hetianga tumah thawhpui nei lo, mahni chauha zaiah chuan ‘Last Night’ hi he chart-a No.1 ni rei ber a ni ta a ni.
Luke Combs-a’n Tracy Chapman hla hlui a cover ‘Fast Car’ chu No.2-ah bawk a la awm a, Taylor Swift ‘Cruwl Summer’ chu No.4 atangin No.3-ah a insawn a, Rema leh Selena Gomez ‘Calm Down’ chu No.6 atangin No.4 a kai that leh a, Gunna ‘Fukumean’ chu No.7 atangin No.5-ah a insawn ta bawk.
Chart No.1 hlui Olivia Rodrigo ‘Vampire’ chu No.9 atangin No.6-ah a insawn a, Dua Lipa ‘Dance the Night’ chu No.10 atangin No.7-ah insawnin, Nicki Minaj, Ice Spice leh Aqua, ‘Barbie World’ chu No.8-ah bawk a la awm, chart No.1 hlui Miley Cyrus ‘Flowers’ chu No.12 atangin No.9 a kai thar ve leh ta bawk.
Top 10 khartu chu SZA ‘Snooze’ niin No.15 atangin No.10-ah a invawrh a, he chart-a SZA hla tp 10 kai thei pariatna a ni a, a abum ‘SOS’ atanga chart top 10 a lang thei hla pangngana a ni bawk.