Morgan Wallen leh Luke Combs ten Hot 100 chart record an siam

Morgan Wallen album ‘Last Night’ chu Billboard Hot 100 (singles) chart-ah a No.1 a, he chart-a kar 12 a No.1-na a ni ta a, hetihrual hian Luke Combs ‘Fast Car’ pawh No.3 atangin No.2 a rawn kai thar a, tihian kum 42 chhunga a vawi khat nan Hot 100 chart No.1 leh No.2-ah country hla an indawt ve ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Morgan Wallen hla hit ‘Last Night’ hian kar khat chhungin stream maktaduai 29.8 leh download sales 7,000 a la nei thei a, radio airplay-ah pawh ngaithlatu maktaduai 72.2 a la nei thei bawk a, hei hi a kar 12 nan chart-ah a No.1 pui leh ta a ni.
‘Last Night’ hi March thla khan No.1 a rawn ni tan a, Morgan Wallen hla he chart-a No.1 ni thei hmasa ber a ni. He hla hi a No.1 album ‘One Thing at a Time’ atanga a single niin, he album pawh hi kar14 chhungin Billboard 200 (albums) chart-ah a No.1 tawh a, Billboard 200 leh Billboard Hot 100 chart-ah a rualin tum 10 a No.1 tawh a, Billboard chart history-ah tun kum 30 chhunga album leh album-a hla kar 10 chin No.1 ni ve ve thei hmasa ber a ni.
Luke Combs-a’n Tracy Chapman hla hlui a rawn sak lar thar leh tak ‘Fast Car’ chu radui airplay maktaduai 51.3 leh streaming maktaduai 21.2 bakah sales 10,000 tling lehin No.3 atangin No.2-ah a invawrh ve ta a, he hlain Hot 100 chart-a a tawn san ber a la ni. He hla hi Tracy Chapman hian 1988 khan chart No.6 a lo kaipui ve tawh bawk a ni.
Heti hian country hla pahnih, Morgan Wallen ‘Last Night’ leh Combs ‘Fast Car’ te chu Billboard Hot 100 No.1 leh No.2 an ni a, he chart history-ah kum 42 chhunga chart No.1 leh No.2-a country hla tum khata an awm ve ve vawi khatna a la ni. Tun hnaiah country hla a lar thar leh riau a, Billboard Hot 100 top 10-a lan tam lamah pawh tun kum chanve chhung hian country hla leh pop hla hi a inzat thuak a ni.
Rema leh Selena Gomez ‘Calm Down’ chu No.4 atangin No.3 a kai thar leh ta. Rema hian ‘Calm Down’ original version hi nikum February khan a tlangzarh tawh a, a solo album hmasa ber ‘Rave & Ross’ atanga a single a ni. Nikum August khan Selena Gomez nena remix an tichhuak a, a official video pawh September-ah an tichhuak leh bawk.
Chart No.1 hlui Miley Cyrus ‘Flowers’ chu No.2 atangin No.4-ah a tawlh a, Lil Durk ‘All My Life’ featuring J. Cole chu No.5-ah bawk a la awm a, Toosii ‘Favorite Song’ pawh No.6-ah bawk awm lehin, Taylor Swift ‘Karma’ featuring Ice Spice chu No.9 atangin No.7 a kai thar leh a, chart No.1 hlui SZA ‘Kill Bill’ chu No.7 atangin No.8-ah a tawlh a, Metro Boomin, The Weeknd leh 21 Savage “Creepin'” chu No.8 atangin No.9-ah a tawlh a, Eslabon Armado leh Peso Pluma ‘Ella Baila Sola’ chu No.10-ah bawk a la awm.