MoS Robert-a ban tura ngenna Larsap-in ECI-ah hlanchhawng

MoS Robert-a ban tura ngenna
Larsap-in ECI-ah hlanchhawng
Office of profit kaihhnawiha MLA/minister a nihna atanga Robert Romawia Royte ban tura ZPM party-in an ngen chungchangah Mizoram larsap chuan Election Commission of India enfiah turin a hlanchhawng a. Minister hian dan bawhchhiat a neih loh avangin ban ngawt theih a ni lo tih a sawi thung.
Larsap hian March 16 khan ECI hnenah he thu hi thlen chhawngin, MLA/ minister Robert Romawia Royte puh a nih dan hi zirchiang a, an ngaihdanah thuthlukna siam turin a hlan a ni.
Hemi chungchangah hian Robert Romawia Royte chuan thuchah siamin, tih dan phung pangngaiin ZPM petition thehluh hi ECI-ah thawn a nih hmel a, a tul an tih chuan ECI hian ama comments pawh an rawn dil ve maithei tih a sawi a. Dan bawhchhiat a neilo a, MLA atanga ban ngawt theih a ni loa, thudik chu a rawn lang mai turah a ngai tih a sawi.
“Assembly Session-a ZPM leader-in ngaihdam min dil zan atang khan ZPM hian min beiiin min umzui nasa hle a. MLA atanga ban tura larsap-a min hek pawh hi khami nghawng zel kha niin a lang,” a ti.
ZPM Vigilance Department chuan larsap Hari Babu Kambhampati hnenah kumin February 28 khan lehkha thehlutin, minister of state Robert Romawia Royte hi consultancy firm – Northeast Consultancy Services (NECS) neitu niin, vawiin thlengin chhiah pawh GST hnuaiah return a la file a. He firm hian duhsakna uchuak tak hmangin Mizoram sawrkara District Council & Minority Affairs nen deed of agreement chu ‘single source selection’ hmangin an ziak a. NECS hi proprietorship, mimal sumdawnna a nih angin, a neitu leh hlawkna teltu chu amah Robert Romawia hi a ni tih a chiang a. Representation of the People Act 1951 Section 9(A) bawhchhiain diklo takin a thuneihna hmangin hlawkna a tel (office of profit), tia thlenin, Constitution of India Article 192 (1) hmanga MLA/ minister atanga disqualify turin an ngen.