MotoGP bultanna hnehtu Bagnaia bawk

MotoGP bultanna hnehtu Bagnaia bawk
Pathianni khan MotoGP season thar an tan a, Portuguese Grand Prix-ah defending champion Francesco Bagnaia a chak ber.
Inrinni khan intlansiak hmahruai (MotoGP inaugural sprint race) lamah Italian Ducati rider Bagnaia hi chak tawhin, Pathiannia intlansiak tak tak (main race)-ah pawh hnehna chang zui lehin, point 37 nen rider standing-ah hma a hruai nghal.
Portugal rama bike intlansiak level sang berah hian Aprilia bike khalhtu Maverick Vinales chu pahnihna niin, Ducati rider Marco Bezzecchi chuan lawmman semna dawhsan hniam ber a luah ve bawk.
Hnehna a chan hnuah Bagnaia chuan intlansiak rei tak a nih thu leh a hlawhtlinna avanga a hlim em em thu sawi chungin team-in an duh ang taka bul an tan thu a sawi.
Beisei loh taka pole-sitter rawn ni hlawl Marc Marquez chu chefuh loin, kar lohah rider pathumin an lehpel nghal a, tualchhung rider beiseiawm Miguel Oliveira chuan opening lap-ah palina atangin hmahruaitu nihna a luah chho a; chumi hnuah Marquez talbuai zelin, Pramac Racing rider Jorge Martin a tihbuai hnuah Oliveira a chetsualpui zui a, Marquez leh Oliveira tan race a tawp chawpchilh zui nghal!
Replay atanga a lan danin Marquez-a bike chuan Oliveira bike hnung a va su a, a hnu lama Honda-in an sawi danin Marquez hian a kut ruh a tiauh niin a lang a; Oliveira hi a dinhmun endik turin medical centre lamah an hruai ve bawk.
Kha thil thleng hlawkpuitu Bagnaia chuan hma hruai nghalin, harsatna sawi tham tawk loin Vinales a dang tluan thei a, nuamsain season bultanna race-ah hnehna a chang.
Dam chiang lo chunga inlan France rider Johann Zarco chuan palina luahin, Gresini Racing a zawm hnua race a hmachhawn vawikhatnaah Ducati khalhtu Alex Marquez pawh panganaah a thleng ve bawk.