Mount Fuji a lawn chhuak thei upa ber

Mount Fuji a lawn chhuak thei upa ber
Japanese Kokichi Akuzawa chuan kum 102 leh ni 51 a upa niin, Mount Fuji tlang chhip a lawn chhuak (summit) a, he tlang lawn chhuak thei upa ber record a siam. Mount Fuji hi meter 3,776 (feet 12,388) a sang a ni.
Kokichi Akuzawa hi Gunma Mountaneering Club-ah honorary chairman niin, kartin tlang a la lawn ziah thei a. 2022 khan meter 1,272 a sang, Nabewariyama chu a kum 99 a tlinchampha lawmnan a lawn chhuak tawh bawk.
Mahse, tun tum chu a kum rualpui zinga tuman an la tih ngai loh tih a duh ta tlat a, Mount Fuji a lawn ta a ni. Kokichi hian kum 96 mi a nih laiin Mount Fuji hi a lawn chhuak tawh bawk.
August ni 3, zing dar 8:40 khan Kokichi hian Mount Fuji hi a lawn tan a, tlan lawn nan hian a kawng zawh nuam ber Yoshida route a thlang a, tlang chhip thlen nana kawng zawh nuam ber ni mah se kawng naran lo tak a la ni tho tho, tlang chhip thleng turin darkar ruk vel tal a ngai thin. Chutiang chu kum 102 mi tan chuan thil naran lo tak mai a ni.
Kokichi tan ni khat thil thua han lawn chhuah ziazang a ni tawh lo a, kawng lakah zan hnih a riak a, vanneihthlak takin boruak a nuam hlauh bawk a, a ni thumnaah a chhip a chuang chhuak ta a ni. Hetianga tlang sang lawn chuan boruak hip tur a tlem avangin thawk te a lo harsa thin a, kum 102 mi tan chuan a hautak lehzual dawn a ni.
A ni khatna leh ni hnihna chu harsatna nei lovin a kaltluang viau a, kumin January thlaa heart failure lo nei tawh a ni bawk nen, a ni thumnaah erawh a boruak hip a buai ta deuh a, thulh leh mai te a tum deuh ut ut a, mahse, a tawiawmtu ten an fuihphur zel a. Tlang chhip thlen hma deuh, station 9-naah chuan tawpsan mai a tum ta a, a dinhmun te ngaihtuahin tuman an tilui ngam tawh lo, mahse, a fanu, Motoe, kum 70 chuan, pen khat te te a ti tang tang turin a nawr a, August ni 5, chawhma dar 11-ah a chhip a thleng thei ta a ni.