MP inthlan atan BJP candidate Vanlalhmuaka

BJP Mizoram chuan Lok Sabha MP Inthlanpui lo awm tur atan Vanlalhmuaka chu Official Candidate atan a puang.
BJP Mizoram Official Candidate puanna BJP Mizoram State Office, Mipui Run, Upper Republic-ah nimin khan neih a ni a, Vanupa Zathang, IPS (Retd), State Vice President-in inkhawm a kaihruai a, Lalramtiama, State Core Group Member-in MP Official Candidate a puang a ni.
Lalramtiama chuan Mizorama party hrang hrangin MP Candidate kan neih ho zingah chuan MP Mizoram tana tha ber tur kan nei a ni, a ti a, Mizoram Sorkar leh Sorkar hnathawk te, thalaite tana hnathawh tur tam tak kan neih theihna turin an Candidate Vanlalhmuaka vote pui turin mipui a sawm a ni.
Vanlalhmuaka chuan thu sawi in, “NE State-a Kristian State kan tih hoah BJP leh Tualto Party-te Sorkarna a awm zel a, chung State-a kan thawhpuite nen chuan MP intawm an nei mai a, keini State ah erawh BJP te chuan thawpui nei lovin keimahniin kan ding dawn a ni. Nimahsela vawiinah hian Mizoram mipuite ka ngen duh che u chu; Central-ah ngampa tak leh huaisen taka Mizoram mamawh kan sawichhuah theihna turin BJP MP hi a pawimawh a, MP kan neih tawhte hmalakna enin BJP MP emaw, BJP leh a thawhpui MP an nih loh chuan thil tih a har hle a ni tih a chiang a ni. Chuvangin Mizoram tan, Mizorama Sorkar mek tan, Mizoram mipui tan BJP MP neih hi a pawimawh hle a ni,” a ti.
“Mizoram MP ka nih chuan Mizoram tana hma ka lo lak tawhna te kha a taka tihhlawhtlin a nih theih nan hma ka la dawn a, kan State Ramri chungchangah pawh Mizoram CM ka thlawp ang aia nasain hma ka la thei dawn a ni. Tunah hian MP Candidate tha tak tak Party dang dangin kan nei hlawm a, mihring mihrinnaah chuan kei aia fel te an ni hlawm ngei ang. Nimahsela vawiina Mizoramin MP Mizoram tana kan mamawh erawh chu Mizoram mamawh sawichhuak thei MP a ni thung a, BJP MP Mizoramin kan nei a nih chuan Central-ah Pathian zarah BJP kan Sorkar leh ngei dawn bawk avangin Mizoram mamawh sawi chhuak thei tur erawh chuan kei aia nawrchhuak thei chu an ni lo thung dawn a ni. Chuvangin Mizoram-in sum leh pai leh thil danga kan harsat mekna te sutkian a nihna turin min thlang tling ula, kan thusawi hi a takin mipuiin a rah kan seng ngei dawn a ni,” a ti.
Hmuaka chuan Mizorama MP a nih chuan Kristian State leh Kristian MP Lok Sabha atanga tling tlemte zinga mi a nih dawn a vangin Minister chanvo min pek a rinawm tiin a sawi a. Ngaihtuahna fim tak hmang chunga party sawi lova Mizoram tana hna tha tak a thawh theih nan Vote theuh turin mipui a sawm nghal a ni.