MP inthlan atan Congress-in Secular Force an tharthawh

Lok Sabha MP inthlan turah India rama BJP sawrkar paihthlak a nih theih nan Mizoram Secular Force-a tel turin mi zawng zawng an sawm tih Congress party chuan an sawi.
MPCC president Lal Thanzara chuan India ramah Hindu sakhaw betu ni lo, a bikin Kristianten BJP sawrkar hnuaiah nekchep an tuar nasa a. India pakhat, culture pakhat, sakhua pakhat tih chu an auhla niin, Hindu sakhuaa inchhunglut vek turin min duh tihna a ni ber tih a sawi.
Lok Sabha inthlan hnuhnung bera BJP manifesto zing ami, Citizenship Amendment Bill (CAB) hman, Uniform Civil Code hman, Muslim Temple Ayodhya rama Ram temple sak an tiamte chu an tihlawhtling chho ta zel tih sawiin, Assama BJP sawrkar pawhin an state Assembly House-ah ‘Assam Healing (Prevention of Evil) Practices Bill 2024’ pass in, he dan ang hi chuan Isua Krista hminga tihdam rawngbawlna neih phal a ni dawn tawh loa, an tih chuan man an ni zel dawn, tih te a sawi a ni.
“Kan ram leh hnam hmangaihtu, ka Mizo puite, central-a sawrkarna chelh mektu BJP-in hnam tenau zawk leh sakhaw tenau zawkte dimna nei miah loa dan hmanga min sawisa thin hi tihbo a tul takzet a; CAA, UCC, Anti Conversion Act hmangin Kristiante min bei chamchi mai hi tihtawp a ngai a, kan titawp lo a nih chuan kan la ral mai ang tih a hlauhawm. Kan ram danpui ami, secularism paihbo an tum hi Kristiante tihchhiat vek an tumna hmanrua a ni,” Lal Thanzara hian a ti.
Central-a BJP sawrkar paihthla turin Congress party chuan Mizoram Secular Force a din tih a sawi a. Political party hrang hrang, NGO, kohhran hote tel turin an sawm a; ram, hnam, sakhua a himna tura pheikhai rual taka tanho puiah an sawm tih a sawi a ni.