MP inthlan hun April 19 Eco friendly-a neih tum

India ram puma Lok Sabha member inthlanpui neih turah Mizoram chu phase khatnaah awmin April 19-ah vote thlak a ni ang. Mizoram chief electoral officer Madhup Vyas chuan inthlan hi environment tana him ‘eco friendly’ a neih tum a ni tih a sawi.Election Commission of India chuan political party-te leh candidate-te chu hman khat daih plastic atanga thil siam leh tawih thei lo hmanrua hmanga campaign lo tur leh, environment tana him hmanrua chauh hmang turin a ngenin a beisei tih CEO hian a sawi a. Political party pawh single use plastic hmanga poster, banner adt. hmang lo zawnga hma la tura tih an ni tih a sawi.
Assembly inthlanah voter turn out tha state 5 zingah Mizoram chu tel pha tawh mah se, MP inthlanah erawh vote tla a la tha lo thin a, vote tla a tam theih nan hma lak ho a tul tih a sawi a ni.
Kum 85 chin chunglam chu anmahni inah vote an thlak (home voting) thei a, vohbik (Persons with Disabilities) pawh polling station pan thei lo tih tihchianna a awm chuan home voting a theih reng a. An duhthlanna ve ve ah a innghat tih a sawi.
Sakhaw rinna avanga vote thlak lo thinte pawh vote thlak turin CEO hian a ngen a. “Inthlan hi mipui tana thil pawimawh a nih vangin vote thlak thei apiang chu vote thlak vek turin kan sawm a ni,” a ti.
Sum leh sawrkar tha chakna hmanga vote lei a awm loh nan tan lak a ngai tih a sawi bawk.
Election Commission thupek angin, polling station zawng zawngah Assured Minimum Facilities (AMF) dah vek a ni anga, mamawh chi hrang hrang – a hrana hmeichhia leh mipa inthiarna, vohbik tana ramp siam leh tul dang dah vek a ni dawn tih a sawi.
Constituency tinah hmeichhe hlang enkawl leh vohbik hlang enkawl tur polling station pakhat theuh leh model polling station pakhat tal siam tum a ni a, Commission thupek angin critical polling station zawng zawngah leh polling station zawng zawng zatve aia tlem loah vote thlak lai vil turin webcasting tih tum a ni tih a sawi bawk.
Model code of conduct chu inthlan puan a nih chiah atanga hman nghal tur a ni, tiin, political party leh candidate ten tha taka zawm turin a chah.

8 Inthlan chuh tum hming pek luh ni hnuhung chu 2024 March 27 a ni a, nomination scrutiny chu March 28 niin, candidate inhnuhdawh theih ni hnuhnung chu March 30 a ni.
8 Vote tla hi 2024 June 4-ah chhiar a ni anga, June 6 hmaa inthlan kaihhnawih zawhfel vek hman tum a ni.
8 Electoral roll-ah vote nei mipa 414777 leh hmeichhia 441520 bakah service voter 4980 an awm a, Mizoram puma vote nei zat chu 861277 an ni.
8 Vote nei tamna ber district chu Aizawl (288268) niin, an tlemna ber district chu Hnahthial (16257) a ni.
8 Vote nei tamna ber Assembly constituency chu 36-Tuichawng, Lawngtlai district (36493) a ni a, tlemna ber 34-Thorang, Lunglei district (15152) a ni.
8 Vote nei zingah mipa za zela hmeichhe awm zat chu 1064 a ni a. Mamit district-ah chauh hmeichhe vote nei aiin mipa vote nei an tam zawk.
8 Youth voter (kum 18-19 inkar) 36214 an awm a, senior citizen (kum 85 leh a chunglam) 4758; vohbik (PwD) 3399 an awm.
8 Polling station 1276 siam a ni a, 2019 Lok Sabha inthlan aiin 101-in a tam zawk.
8 Venhimna thawk turin state police 3000 chuang leh Central Armed Police Forces (CAPF) company 15 vel an duty dawn.
8 SVEEP chu mi cheng vil zual ngaihna hmun (vulnerable community) a hman tum a ni a. EVM leh VVPAT model thar ber M3 hman a ni dawn.
8 Mamawh palha a rang thei anga damdawi in panpui thei tur air ambulance ruahman a ni.