MP pakhat chauh nei kan ni a, kan inngaihtuah chian a ngai – Dr K Beichhua

India ram pumah MP 500 chuang an awm a, MP pakhat chauh nei Mizoram mipui kan inngaihtuah chian a ngai a, central minister ni thei, diltu ni loa petu ni thei dinhmunah kan ding tih BJP MLA Dr K Beichhua chuan a sawi.
Thawhtannia BJP State office-a inkhawmah an party Election Management coordinator ni bawk Dr K Beichhua chuan, “Lok Sabha MP inthlanah mipuiin ngun taka ngaihtuah ngai chu, Mizoram MP pakhat hi central hian a mamawh viau angem, nge keimahni zawk hian kan mamawh, tih hi a zawhna a ni tih a sawi a. Mizoramin kan mamawh zawk tih hriat a ngai a, MP pakhat chauh kan neih avangin induh thei leh chapo thei kan ni loa, mipui kan inngaihtuah chian a ngai tih a sawi.
India ramah MP 543 kan thlang chhuak dawn a, chumi atang chuan Mizoramin MP pakhat kan nei ve tih a sawi a. Mizorama MP candidate 6 atanga campaign auhla kan hmuh mek leh kan dinhmun enin beidawn thlak a tih thu a sawi bawk.
“Party pakhat chuan central-ah zawlpui neih an tum loh thu an sawi a, MP 543 zinga zawlpui neilo pakhat khan enge a zuk tih ang. Pakhat chuan Mizorama NDA nilo, central-ah NDA nih a tum a, ‘chinghne beram vun’ sin hi central-ah hian a langchiang viau dawn. Pakhat leh chuan BJP do tur hrim hrimin a in candidate tih a sawi a, mipui tan a beidawn thlak hle. Kan candidate-te thil tih tum leh an thusawi ngaihtuah hian, BJP MP candidate kan neih chuan Union minister a ni thei dawn a, BJP candidate nilo, party dang candidate hi thlang ta ila, central-ah thil diltu an ni dawn a, BJP candidate erawh a diltu niloin, a petu zawk a ni dawn,” Dr K Beichhua hian a ti.