MPF awmna leh awm loh na a dang hle – Lalduhoma

MLA inthlanpui neih zawh takah MPF (Mizoram People Forum) awmna leh awm lohna chu a dang hle tih ZPM leader Lalduhoma chuan a sawi.
Thawhtannia an party office-a inkhawmah ZPM leader chuan inthlan neih zawh takah MPF awm leh awm lohna a dang hle a, hmun thenkhatah MPF ngaihtheih lohna a awm nia a lan thu a sawi. “Inthlan thianghlim leh felfai Mizoramin a neih theihna tura theihtawp chhuahtu, a neitu pawh kohhran leh NGO zawng zawng bakah political party zawng zawng kan nih avangin pawl hrang daih anga ngaih tur an ni loa, a neitu vek kan ni,” a ti.
Inthlan boruak thlirin sawrkar siam ngei an inbeisei a, sawrkarna an siam a nih chuan party vote niloin ram mipui – neutral leh Pathian vang a ni ang, tiin Lalduhoma hian a sawi a. Party sawrkar ni lo, mipui sawrkar din an tumna kawngah min tawngtaisaktute leh kawng hrang hranga theihtawp chhuahtute chungah lawmthu an sawi tih a sawi a ni.
“Sawrkar tha zawk nei turin mipui kan tuihal tih a lang a, kum naupang deuh, vote nei thar leh upa zawk thlengin vote thlak turin phur takin kan penchhuak tlang a, vote pawh a tla tha hle. Neutral-in vote an thlak that avangin heng mite hi kan ram tidamtu leh siamthatu an ni dawn,” a ti.
Kum 5 chhungin party naupang ber leh sum lamah pawh pachhe berin inthlan hrang hrang – AMC, LMC, by-election, VC/LC kan hmachhawn a, a hautak hle chungin, result duhawm tak tak an nei thei a. MLA inthlanpuia an result chu an tawngtai chhannaah an ngai dawn tih sawiin, “Chunglamah thawhpuitu kan nei a, hnehna kan chang a nih chuan ZPM party vang niloin Pathian vang leh neutral mipui vang a ni ang,” a ti.