LZ Juice MPL 11 Round 2 chu July ni 12, Zirtawpni khan khelh tan a ni a, champion lai Mizoram Police FC chu Chanmari FC hneh lovin an tlawm. Inkhel dangah Ramhlun Athletic FC chuan Felix Lalruatsanga hattrick hmangin FC Bethlehem an hneh ve bawk.
Champion lai Police FC hian MPL 11-a an khelh hmasak berah Ramhlun Athletic FC chu 3-2 in an lo hneh tawh a, point thum nen season tharah bul an tan. |ha takin bul tan mah se an match hnihnaah team lian Chanmari FC lakah an khawng tluan zo lova, si khat faiin tlawm zawkah an tang. Chanmari FC tan hian Lalnunzama chuan minute 33-naah he inkhel a goal awmchhun hi a thun. He inkhelah hian Chanmari FC player Lalhmangaihsanga chu ‘
Kuriz Man of the Match’ ah thlan a ni.
MPFC hnehtu Chanmari FC hian season tharah bul an tan tha viau a, an khelh hmasak berah MPL a kai thar FC Bethlehem chu 2-0 in an hneh a. An khelh hnihnaah champion lai Mizoram Police FC an hneh zui leh a, hnehna lian an chang zui leh nghal.
Zirtawpni a inkhel dangah an match khatnaa tlawm nghal pahnih Ramhlun Athletic FC leh FC Bethlem an inhmachhawn a, inkhel hmuhnawm takah Ramhlun Athletic FC in hnehna an chang a, point thum an hmu.
Ramhlun Athletic FC tan hian Felix Lalruatsanga chuan minute 27-naah hmahruaina goal a thun a. FC Bethlehem tan Denny Zorammawia chuan minute 45+3-ah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah an inhnehtawk zui viau a, goal pawh a lut leh thuai. Ramhlun Athletic tan Felix Lalruatsanga chuan minute 52-naah hma an hruai nawn lehna goal a thun. Hnufual zawkah tang nawn leh mah se FC Bethlem an hnual mai lova, minute 58-na lekah Thanga Hmar chuan goal thunin an si phurh a sut. 2-2 a nih hnuin hun rei tak goal a luh belh thei lo reng a, hun pek belhah Ramhlun Athletic an che fuh nawn leh. Minute 90+3 naah Felix Lalruatsanga chuan an goal thumna a thun a, team a chakpui. Ramhlun Athletic tan hattrick siamtu Felix Lalruatsanga hi MPL 11-ah hattrick siam hmasa ber a ni.
Vawiin inkhel tur
LZ Juice MPL 11 hi vawiin ah khelh chhunzawm a ni ang a, RG Stadium-ah inkhel pahnih a awm leh ang. Inkhel hmasa zawk chawhnu dar 12:30-ah SYS leh Chawnpui FC te an intum ang a. Chawhnu dar 3:30-ah I League team Aizawl FC leh MPL a team thar Siphir Venghlun FC te an inhmachhawn zui ve leh ang.
MPL 11 – Champion lai Police FC an chak lo
Get real time updates directly on you device, subscribe now.
Prev Post
Next Post