MPL 11 – SYS FC an chetha chhunzawm

Mizoram tualchhunga football club te inelna ngaihhlut hlawh ber Mizoram Premier League (MPL 11) chu RG Stadium-ah khelh chhunzawm zel a ni a, Ningani khan round 3 khelh zawh a ni. Round 3 khelh zawh a nih thlengin MPL club thar SYS FC an chetha chhunzawm a, Ningani khan champion lai Mizoram Police FC chu 3-2 in an hneh. Ningania inkhel dangah Aizawl FC chuan hnehna an chang ve bawk.
SYS FC 3-2 MPFC
Ningani a inkhel hmasa zawkah season tharah beisei phak baka khel tha SYS FC chuan champion lai Mizoram Police FC an hmachhawn a, hma takah goal chhuah mah se 3-2 in hnehna an chang let a, champion lai lakah point thum hlu tak an hmu.
Inkhel ngaihven hlawhah MPFC in bul an tan tha viau a, goal an thawkchhuak nghal thuai. Inkhel tan atanga minute lina lekah Vanlalhriatrenga own goal hmangin hma an hruai. Hma takah goal an thun vangin phur leh inrintawkna sang zawk nen inlan bawk mah se chawlhlawk hmain hnufual zawkah an tang hman tlat thung.
MPL a team thar, player naupang rual, phur leh thatho taka inlan SYS FC hian an si phurh sut ngei tumin tan an khawh a, champion lai lakah hmuhnawm takin an inlan. Na taka an khingpuite an nawr rah an seng a, minute 36-naah Ricky H Vanlalhriatsanga chuan goal thunin an si phurh a sut. An si phurh sutna goal an thun hnuin an khel tha zui viau a, chawlhlawk dawn hnaih minute 45+1 naah Hriatsanga hian hma an hruai letna goal a thun zui leh a, 2-1 hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal pawh a lut leh thuai. Hnufual zawka tang mek MPFC tan Michael Lalbiaksanga chuan minute 51-naah goal thunin, an si phurh a sut. Goal hnih ve ve an thun hnuin an innawr tawn nasa viau a, inkhel hmuhnawm zawk an pho lang. Inkhel hmuhnawm takah SYS FC chu che fuh hmasa zawkah an tang leh a, Lalruatsanga chuan minute 79-naah MPL si nghak tha ber ni mek Muanawma tan dan rual lohin a pet goal a, hma an hruai nawn lehna goal a thun.
Hnufual zawk an nih nawn leh hnuin MPFC in an si phurh sut tuma an khingpuite an nawr a hmuhnawm viau a. Hmahruai zawka tang SYS FC te inringtawk taka an inlan a, ball a inpekual a hmuhnawm viau bawk. Inkhel hmuhnawm takah goal dang a luh belh thei lova, team hmuhnawm SYS chuan 3-2 hnehna changin point thum hlu bik an hmu.
LZ Juice MPL 11-ah SYS FC an khel tha chhunzawm a, vawi thum khel tawhin tlawm an la nei lo. Khelh thum atangin vawi hnih an chak a, vawi khat draw an nei. Point sarih hmu tawhin pathumna an ni chhunzawm a, an chungah hian vawi thum chak zawn thei awmchhun Chanmaru FC leh an mahnih ang thoa point 7 hmu mek Aizawl FC te an awm.
An inlan tawh chinah SYS an an hmuhnawm viau a, champion thei tur khawpin an khel tha. SYS FC player te hi rawlthar tha tak tak an ni a, an squad a chhah tawk viau lo bawk. MPL khelh tur a la tam a, inelna dang hmachhawn tur a awm tel bawk nen he team hmuhnawm SYS hi an tlo zo lo mai ang tih a hlauhawm hle. Beisei aia an tlo a nih ngat chuan trophy an chawi nghal lo ang tih a sawi theih loh.
AFC 3-2 Ramhlun Athletic
Ningania inkhel hnuhnung zawkah MPL leh I League champion hlui Aizawl FC chuan Ramhlun Athletic an hmachhawn a, harsa taka hnehna chang hramin point thum an hmu.
Aizawl FC tan hian T Lalmuanpuia, Lalbiakdika leh Malsawmzuala Tlangte ten goal an thun a. Ranhlum Athletic tan Lalawmpuia Hnamte leh Felix Lalruatsanga ten goal an thun ve bawk.