May 22, Nilaini khan 1st Bn. MAP Ground, Armed Veng-ah Mizoram Premier League (MPL) Under 17 final khelh a ni a. Inkhel hmuhnawm takah Aizawl FC academy in an khingpui Chanmari FC chu penalty shootout ah 2-1 in an hneh a, an champion. MPL U-17 khelh zawh takah hian Chanmari FC player pawimawh Lalrinfela Ralte chu ‘Best player’ ah thlan a ni.
Final-ah hian Chanmari FC an khel tha viau a, tum thum ngawt hmahruai zawkah an tang a, an hmahruaina hi uiawm takin an hum zo lo vek thung. Hun pangngai leh hun pek belhah 3-3 a an inhnehtawk hnuin penalty shootout ah team hnihten pet goal an harsat a. Pet goal tam zawk Aizawl FC chu vannei zawkah an tang.
Chanmari FC tan hian Lalrinfela Ralte chuan minute 22-naah hmahruaina goal a thun. Rinfela goal hmanga hma an hruai reng hnuin chawlhlawk dawn hnaihah goal an chhuah. Aizawl FC tan Christopher Zaithantluanga’n minute 45-naah goal thunin an si phurh a sut a. 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, an inhnehtawk lehzual hle. Hun rei tak chhung goal lut a awm theih loh hnuin hun pek belhah goal hnih a lut tlat thung. Hun pek belh minute 90+3-ah Imanuel Lalrohlua chuan Chanmari FC hmahruai nawn lehna goal a thun. Imanuel-a goal thun hmangin an champion tura ngaih a nih hman laiin Aizawl FC an che fuh nawn leh a, an si phurh an sut leh thuai. Hun pek belh tawn dawn hnaih minute 90+6-ah C Lallawmawma chuan goal thunin an si phurh a sut a, hun pangngaiah chak zawk an awm thei lo.
Hun pangngaiah chak zawk an awm theih loh vangin extratime minute 30 dang an khelh belh a, goal khat ve ve thunin chak zawk an awm thei chuang lo. Aizawl FC player Moses Lallawmkima chuan minute 103 naah an lamah a ti-goal a, Chanmari FC hmahruaina goal a thunsak. Chanmari FC hmahruai nawn leh mah se Aizawl FC an zam chuang lova, an si phurh an sut leh nghal thuai. Goal an chhuah atanga minute hnih hnu lekah Chanmari FC player Lalrempuia chuan an lamah ti-goal ve thungin Aizawl FC si phurh a sutsak. Rempuia goal luh hnuin goal dang a luh belh thei lova, 3-3 a inhnehtawk chungin tie-break an hmachhawn.
Penalty shootout ah team hnih player ten an pet goal hlei thei lova, an thelh tlut tlut. Aizawl FC tana pettu pahnihin an pet goal laiin Chanmari FC tana pettu pakhat chauhin a pet goal a, Aizawl FC chuan 2-1 a hnehna changin, an champion ta a ni.
MPL u-17 inelna neih zawh takah hian Aizawl FC goalkeeper Gabriel VL Ruathlua chu ‘Best Goalkeeper’ ah thlan a ni a. Defender tha berah Electric Veng FC denfender Lalremtluanga thlan a ni a, Best Midfielder-ah Aizawl FC academy midfielder Freddy Lalruatfela thlan a ni a. Chanmari FC forward Lalrinfela Ralte chu forward tha berah thlan a ni a, Rinfela hi best player a ni tel bawk. Inelna neih chhunga Electric Veng FC tana goal 9 thuntu Lalhruaitluanga chu topscorer niin, Golden Boot a dawng ve thung.
MPL u-17 champion Aizawl FC
Get real time updates directly on you device, subscribe now.
Prev Post
Next Post