MPSC chungchang…
Mizoram Public Service Commission (MPSC) in Combined Competitive Examinations a kalpui dana thil fel tawk lo awm anga Mizo Zirlai Pawl ten an auchhuahpui hnuaa MPSC insawifiahna chu MZP chuan an pawm thei lo va. MPSC chairman chu he thila mawhphurtu berah ngaiin tunkar chhung ngeia bang turin an phut nawn a.
Combined Competitive Examinations hnuhnung bera mains exam paper thenkhatah correcting fluid hman niin, mark pek tawh sa thaichhiatna leh mark tihdanglamna hnuhma chu hmun hnih-khat mai ni lo, hmun tam takah a awm, tiin MZP lam chuan an sawi a; hna lak dana sawiselna hi MPSC chhung atang pawhin hrilhtu an awm, tih an sawi bawk.
MPSC lam chuan, answer sheet-ah thai hnawk lo tura evaluator-te an hrilh vek chung pawhin correcting fluid hman ngai tura lo thaihnawk tawk an awm thin niin an sawi ve thung a.
He thil thleng chungchang hi a reh zui mai dawn emaw tih laiin MZP lam an lungawi thei lo a, MPSC zahawmna humhim a nih zel a, zirlai hna zawng mekten an rinna an nghah zel theih nan chairman hi tun kar chhungin bang se an duh a. An ngennain awmzia a neih loh chuan, chairman ban a nih ngei theih nan hma an la dawn tih an sawi bawk a. Boruak hi a dai mai dawn lo niin a lang.
Mizoram public service commission lehzelah thil dik lo a thleng tak tak a nih ngat chuan, Mizoram hian innghah ngamna kan nei tawh lo tihna tluk a ni hial awm e. MSSSB lah hleih nei taka hna lakna angah kan chhuah deuhthaw tawh a, MPSC chhungah ‘correcting fluid’ nasa taka hman a ni hi, han ngaihthat vakna tur niin a lang lo hrim hrim a, MPSC lam insawifiahna hi lo dik ta pawh ni se, correcting fluid hman thluah ngai khawpa hnuhma hnutchhiahtu evaluator atana rawihte an expert lo hle tihna a ni a, chu ringawt pawh chu lungawithlak loh tak a ni tawh. State pakhat chhunga hna sang ber ber lakna Exam chhanna endiktu inthlahdah tak chu thil dangah pawh a inthlahdah ang tih a rinawm a. Chuvangin, MPSC zahawmna leh dikna humhim zui zel a nih theih nan thil awmzia chiang taka finfiah law law hi nakin hnu zela kan thattlanna tur a nih a rinawm.