MPSC hna lak dan chhuitu in thil fel lo a hmu lo tih a sawi

Mizoram Public Service Commission hnuaia tunhnaia hna thenkhat lak dana thil dik lo awm nia sawi chungchang chhuitu chuan thil dik lo engmah a hmu lo tih a sawi.
MPSC-in Mizoram Combined Competitive Examination leh assistant conservator of forest a lak danah dan dik loa thil tih a awm nia hria in MZP chuan he thila a mawhphurtu ber nia an ngaih MPSC chairman bang turin an phut a. Hemi chinfel nan hian sawrkar chuan chief secretary hlui, MPSC chairman hlui ni bawk M Lalmanzuala, IAS (Rtd) a ruat a, a ni hian sawrkarah report a thehlut tawh.
Thuthar thehdarhtute a kawmnaah M Lalmanzuala chuan, he thil lo irhchhuahna ber leh sawrkarin chhuichiang tura a tih chhan chu, candidate tling ve tura innkhan answer sheet-a mark thaichhiat awm velah khan thil dik lo awm theiin a ngai a, hetiang hi awm lo se tling ve turah a inngaih vang a ni, tiin, uluk taka answer sheet leh mark pekna tura tih bik a enkawp hnu leh, statement lak ngai ho a lak hnu ah thil dik lo awmin a hre lo tih a sawi.
Tuna rinhlelh ber, thaichhiat awm nia sawiah, answer sheet-a mark pek leh mark pekna tura daha an pek zat a inang vek a. Mark lo tichingpen se, a chingpen dan hi hmuh theih loh ni bawk se thuhran a nih laiin, an thaichhiatna number zat hi hmuh theih vek a ni tih a sawi.
Chhuichian tura tih a nih tawh laia MPSC office-a thawktu thenkhat lut ru nia sawi chu, an lut ru loa, MPSC hotute leh a duty police-te hriatpuina thlapin, khar lailawk chhunga hna dang lak tura dil tumte an buai lohna atan an hriat tur hrilh ngaih vanga lut an ni tih a chhuitu hian a sawi. Zawhna chhangin, an tih tur nia an sawi hi an ti ngei tih a finfiah bakah tuna sawrkarin chhui tura a tih ho file awmnaah hian an lut thei lo niin a sawi bawk.
Candidate tling zingah mark inang 558 hmu pathum an awm a, tuna complain-tu hian 557 a hmu a. A tling zingah mark inang an awm chuan, general studies-a mark hmu sang ber kha thlan tur, tih a ni tih M Lalmanzuala hian a sawi. Combined exam-a option awm – MCS, MPS, MF&AS leh MIS ah a tam zawk chuan a vaia an thai vek laiin, MPS emaw a dang ti tel lo an awm a, an option pek loh bera a aia mark hmu hniam, option danga an aia mark hmu sangte an awm a; amah aia mark hmu hniamte tlinnaah khan option a pek ve miau loh chuan thlan theih a ni si lo, tiin, chutiang chu tuna buaina bul pakhat pawh hi niin a sawi.
Assistant conservator of forest lak turah pawh recruitment rules (RR) anga kal niin, RR-a awmsa qualification bak qualification tha zawk neite pawhin an exam a, amaherawhchu, RR-ah an la awm miau loh avangin tun tumah hian lak an ni ta lo tih a sawi bawk. He hna dil tur hian RR-a qualification lang sa bak, thiamna dang nei pawhin an exam thei ang tih a nih angin, MPSC chuan exam an phalsak a, hnaa lak dawn tak takin RR-ah a awm leh si loh avangin an ni tan dah luh luih theih ngawt a ni loa, dahlut thei tur chuan department-in RR a siamthat hmasak a ngai tih a sawi a ni.