MPSC-in asst prof. rawih theih tifel

MPSC-in asst prof. rawih theih tifel
Higher & Technical Education department-in assistant professor 31 lak a tumnaah Mizoram Public Service Commission chuan rawih theih tura a rawt ho chu April 1 khan a tichhuak.
MPSC hian kumin March 16 atang khan personal interview a nei a, April 1 thleng khan neiin, hemi ni vek hian a reccomend ho list hi a tichhuak nghal a. Department 13 atana chhawpchhuah niin, English-ah 5, Mizo 2, Political Science 4, History (unreserved) 4 leh (reserved for persons with disability) 1, Education 3, Economics 4, Geography 2, Sociology 1, Commerce 1, Mathematics 1, Botany 1, Physics 1, Geology 1 a ni.
Heng recommended candidate zinga hna pek hnar emaw bang emaw thi emaw an awm chuan, chumi hmunruak luah thei tur chuan reserved panel-ah a dah theuh bawk a, kum khat chhung a nung ang.
Recommended candidate zingah hian address atan Mizoram chhung ni lo hmang an awm loa, Zohnahthlak an ni vek bawk.
Mizo Students’ Union Gen. Hqrs chuan MPSC-in assistant professor lak tura result a tihchhuahah Mizo vek an ni chu lawmawm a tih thu a sawi a. MPSC-in assistant professor a la dawn tih a hriat tirh atangin, a thiam leh tling an awm a nih chuan a ram leilung fa ngei he hnaah hian an luh theihnan theihtawpin MSU chuan hma a lo la tawh thin tih sawiin, ‘Mizo thalai hna zawng mekte pawh tling ngei thei tura theihtawp chhhuah turin nasa takin kan lo infuih tawh thin a. Chutih mek laia assistant professor post awm zawng zawnga Mizo an tling thei vek hi a lawmawm a, tling tharte pawh kan lawmpui hle a ni,’ a ti. Tling tharte chu zirlaite leh ram leh hnam hmangaihna rilru nena hna thawk turin duhsakna a hlan tih a sawi bawk.
Hetihlai hian MPSC chuan Higher & Technical Education department hnuaia thawk tur tho assistant professor (Hindi & Law) lak tura personal interview hmachhawn thei tur list chu April 2 khan a tichhuak a.MI 19 koh tura a tih zingah pakhat – state pawn lam mi hnamdang tih loh chu Mizoram ami vek an ni.