MPSC member thar lalut

Mizoram Public Service Commission (MPSC) member-a ruat thar PB Lianthangpuii MIS (Rtd) chu Ningani khan Raj Bhavan-ah larsap Dr Hari Babu Kambhampati chuan rinawmna thu tiamtirin a lalut a. MPSC member atana hmeichhe ruat pahnihna a ni.
MPSC member thar lakluhna hi chief secretary charge la mektu Home commissioner H Lalengmawia chuan kaihruaiin, MPSC member atana PB Lianthangpuii ruat a nihna lehkha a chhiar chhuak a. Larsap chuan rinawmna thu tiamtirin a lalut zui a ni.
MPSC member thar lakluhnaah hian chief minister Lalduhoma, Assembly speaker Lalbiakzama, Lok Ayukta chairman C Lalsawta bakah sawrkar mi pawimawh leh sawmbik mi thenkhat an tel.
MPSC member thar PB Lianthangpuii hi 1964 January 11 khan Dawrpui Vengthar Aizawlah a piang a. A nu leh pa chu P Lalzuala (L) leh Lalawii te an ni. A pasal Dr ST Lalruatfela nen fapa 2 leh fanu 2 an nei a; Dawrpui Vengtharah an cheng mek.
Thiamna lamah MA (Pol.Sc) a ni a. 1981 MBSE HSLC Exam-ah 14-na niin, hemi tum hian English leh Social Studies subject-ah mark a hmu sang ber. PU (class 12) atanga BA thleng Loreto College Darjeeling-ah a kal a. MA hi Pune University atangin kum 1988 khan a zo ani. School leh college-ah zirtirtu hna a thawh hnuiin kum 1989 khan Mizoram Information Service-ah a lut a. A thawhna I&PR department huangah mawhphurhna pawimawh tak tak a chelh thin. PRO to Governor, sawrkar flagship program-a Media Cell enkawl hna te a thawh hnu in 2024 January 31 khan joint director-in a pension a ni.