MPSC sawisel duh leh rawtna nei duh tan thlen turin an ngen

MPSC sawisel duh leh rawtna nei duh tan thlen turin an ngen
Mizoram Public Service Commission an thil kalpui danah sawisel duh nei leh rawt duh nei tan chairman emaw secretary hnenah emaw thlen theih reng a ni tih an sawi a. An kal sual hlauhpuitute chungah an lawm tih an sawi.
Mizoram Public Service Commission (MPSC) thuchhuak chuan, MPSC chu India Danpui Article 315 hnuaia din niin, din a nih chhan ang ngeiin mipui leh sawrkar tan chhenfakawm takin a tir atanga vawiin thlengin hna a la thawk zel tih a sawi a. 2024 calendar year kal mekah sawrkar hnathawk laite an kaisan theihna turin Departmental Promotion Committee vawi 209 a thu tawh a, mi 505 chu an hnaah an kaisan theih phah tih a sawi.
Direct recruitment hmanga hnaruak hnawhkhahna turin kumin chhungin Group A leh Group B (gazetted) bikah post 22 atan vawi 17 examination neih a ni tawh a; Group B (non-gazetted) hnalakna atan tum 3 exam buatsaih a nih bakah department 5 hnuaia thawktute tan departmental examination vawi khat huaihawt sak a ni tawh a, sawrkar hnathawk lai kaisanna turin department 8-a thawktute tan Limited Departmental Examination neih a ni a, sawrkar hna diltuten Mizo tawng an thiam ngei em, tih fïnfïahna turin Mizo Language Proficiency Test/Exam vawikhat neih a ni tawh tih a sawi,
Mizoram sawrkar thuchhuak angin, Group A leh B chin, pay matrix level 6 leh a chunglam hnalakna atan MPSC-in exam a kalpui a. Home department leh Excise & Narcotics department hnuaia asst. sub inspector (ASI) leh a chunglam, EF&CC department hnuaia deputy ranger (level 6) chin chunglam, Commerce & Industries hnuaiah marketing inspector (Level 6) chin chunglam zawng chu MPSC buaipui tur chi a ni tih a sawi.
Heta department tarlan hnuaia thawktu dang – asst. marketing inspector – level 4 (Commerce & Industries), forester – level 4 (EF&CC) leh head constable – level 4 (Home) chungchang erawh MPSC huang pawnlam a ni tih a sawi thung.
Home department hnuaia ASI (M) hna lak kalpui mekah ‘measurement’ tih hun pawhsei a ni leh, 1000m & 100m tlan hun chhung bituk siam tawh tihdanglam a nih chungchang hrethiam lo mi thenkhat an awm nia a lan thu sawiin, ‘MPSC portal/ website-a lut thei lo mi thenkhat an awm tih hriat a ni. Hei bakah hian Mizoram hmun tam takah leimin/ kawngchhia avanga mahni measurement tih huna an khua atanga Aizawl thleng thei lo candidate engemawzat an awm tih hriat a ni bawk. Heng mite avang hian loh theih lohin measurement lak hun pawhsei a ngai a. 1000m & 100m tlan hun chhung bituk tihsei /tihrei chungchangah ASI(M) Recruitment Rules-a lang lo, Mizoram Police Manual-a chuang bawk si a awm avangin Police Manual behchhanin tlan hun chhung bituk hi Home department duhdan angin tihdanglam a ngaih phah a. Hei vang hian MPSC chuan corrigendum tichhuakin, a hmalama hriattirna a lo siam tawh chu a tidanglam a ni,’ a ti.
6. Exam buatsaih a nih reng rengin a tha leh felfai thei ang bera buatsaih thin a nih thu te, zawhna siam leh syllabus duanah candidate tana tha ber tur nia hriat angin hma an lak thu te, hemi kawngah hian hmasawnna hmuh theiha a awm chhoh mek thu te a sawi bawk.
MPSC chu constitutional leh independent body a ni a. Sawrkar leh mipui tana hna a thawhna kawngah sawisel leh rawt duh nei an awm chuan chairman emaw secretary emaw hnena thlen theih reng a ni, tiin, chanchinbu leh social media-a zualko hma in, thil awmzia hriatchian hmasak tum phawt a, sawiselna leh rawtna nei chuan office lamah ziaka thehlut turin mipui a ngen tih a sawi a ni.