MRB chairman thar Mizo nu

Mizoram Rural Bank (MRB) chairman tharah Mizo nu Sheryl L Vanchhong d/o Remmawia Vanchhong ruat a ni a, 2023 July 17 khan a hna a zawm.
Sheryl L Vanchhong hi kum 2001 khan State Bank of India (Delhi Circle) ah probationary officer-ah bul tanin, SBI branch hrang hrang – New Delhi, Kota (Rajasthan), Dehradun leh Noida-ah te a thawk tawh a. Kum 2006 khan NE Circle lamah transfer niin, Mizoramah pawh SBI New Secretariat Branch bakah Mission Veng Branch & Aizawl Main Branch ah te manager a ni tawh.
Hemi hnu hian State Bank Institute of Learning & Development (SBILD) Guwahati-ah faculty hna zawmin, tuna MRB chairman a nih hma hian Head of Stressed Assets Recovery Branch (SARB) Guwahati, SBI hna a thawk a ni.
MRB chairman hna hi deputation-in kum thum chhung a chelh dawn a ni.
Mizoram Rural Bank hi September 1983 khan Regional Rural Banks Act 1976 hnuaiah din tan a ni a. MRB shareholder-te chu – India sawrkar 50%, Mizoram sawrkar 15% leh SBI 35% a ni. Tunah MRB hian Mizoramah branch 102 leh hnathawk 475 a nei a ni.