MSCPCR-ah ‘Delete kohhran’ inlan

Rinna thil avanga Champhai Zotlanga inkulhhrang mek, ‘Delete Kohhran’ tia sawi thinte chu naupang dikna chanvo bawhchhia nia hriat an nih avangin Mizoram State Commission for Protection of Child Rights chuan insawifiah turin an kohhran hruaitute a ko.
Mizoram State Commission for Protection of Child Rights (MSCPCR) hian Section 13 (1)(j) of CPCR Act 2005 – Deprivation and Violation of Child Rights tlawhchhan leh, MSCPCR Rules 2017-in thuneihna a pek angin, naupang dikna chanvo bawhchhiat chungchangah insawifiah tura a tih angin Nilaini khan Delete kohhran hruaitute chu Commission hmaah hian an inlan a. Commission chuan naupang dikna chanvo hrang hrang a hrilhfiah bakah dan bawhchhetute chu hrem theih an nih thu a hriattir.
Delete Kohhran hi Champhai Zotlang khaw bulah ah an awm a ni. District Child Protection Unit Champhaiin kumin July 5-a a report danin, Delete kohhranah hian naupang kum 18 hnuailam mi 25 an awm a ni.
Thudawn danin, rinna thil avangin heng inkhunghrangte hian sawrkarin khua leh tuite a chhinchhiahnaah pawh tel loin sawrkar atanga hamthatna hrang hrang pawh an dawng duh loa, an naupangte pawh hi school an kal lo nia sawi a ni.