Exam hmachhawn tura inbuatsaih zirlaite ngaihsak a, an tan boruak nuam siam turin Mizoram State Commission for Protection of Child Rights chuan mipui a chah.
-- Advertisement --
School kumtawp exam a hun dawn avangin Mizoram State Commission for Protection of Child Rights (MSCPCR) chuan school naupangten nuam ti tak leh hrehawm ti loa exam an hmachhawn theihna tur thuchhuah a siam a. School, zirtirtu, zirlai leh nu leh paten theihtawp chhuaha hma an lak meknaah tha taka zirlai an zir a, tluang taka exam hmachhawn a, hlawhtlinna an chan theihna’n duhsakna a hlan tih a sawi.
‘Exam emaw test emaw kan hmachhawn dawn reng rengin, mihring hian zam rukna kan nei thin a, hei hi inpuahchahna tha nei tura min turtu a ni ve thin. Amaherawhchu, he zamna/ hlauhthawnna (nervousness /anxiety) hi a nasat lutuk emaw belhchhahtu boruak tha lo dang engemaw a awm chuan kan inbuatsaihna a tibuaiin, exam/ test performance a tichhe vek thei thung. Chu mai ni loin, a aia pawi zawk, lehkhazir kawnga tithuanthu hlentu leh mihring hriselna leh nunna hial tana thil pawi a thlen thei a ni,’ a ti.
Hei vang hian zirtirtute leh nu leh paten kan faten an zirlai thlamuang tak leh bawhbuaitu nei loa an zir theihna’n ruahmanna fel tak siamin, hun leh hmun nuam siamsak thiam a pawimawh tih a sawi a. An zirlai atana an inbuatsaihna tibuai thei leh an rilru tihnual thei thil an tawn loh a pawimawh, tiin, ‘In leh school-ah boruak zangkhai leh hlimawm lam chhawpchhuah sak tum hram hram ila, harsatna an neih leh neih lohte zawt thin ila, an thusawi hrim hrim ngaihthlak sak a, ngaihpawimawh sak hram hram a pawimawh a ni,’ a ti.
School thuneitute chu zirlai nu leh pate nen inremsiamna fel tak an nei a nih loh chuan, zirlaite hmasawn zelna (development) atana harsatna thlen thei thil tuk luih leh phut luih siam lo turin a duh MSCPCR hian sawiin, zirlai naupangten dikna chanvo – ‘Right to Development’ an neih ang ngeiin, exam/test hmachhawn chu an chanvo ve reng a ni tih a sawi.
Naupangin a zirna kawngah harsatna a tawk a nih chuan, Mizoram State Commission for Protection of Child Rights – RTE Helpline number: +91 60098 88804 ah hian phone call/SMS/ WhatsApp hmanga biakpawh theih an ni tih a sawi bawk.