Tlawng lui atanga balu leh lung lak thin chu titawp turin thuneitute ngen an ni.
-- Advertisement --
Centre for Environment and Social Justice chuan Kolasib district magistrate hnenah ziaka thlenin, Tlawng lui Mualkhang leh Khamrang khaw zawnah SM Interior company leh a khaw hnai village council-te nen inremsiamin lui balu leh lung (sand mining) an la a, an la ngei tih pawh an finfiah tih a hrilh a. Heng thil la tura phalna pe turin VC-te hian thuneihna an neih loh bakah environment / forest clearance an neih hriat a ni loa, SM Interior Company hian Mizoram Minor Concession Rule 2000 (Section 13) an zawm lo tih hriat a ni tih a hrilh bawk.
‘National Green Tribunal-in March 2021 khan Enforcement and Monitoring Guidelines for Sand Mining 2020 leh Sand Mining Framework 2018 clause 1.2.8.1 chu state leh UT ten khauh takin an zawm a ni, tiin thupek a chhuah a. Tlawng luia sand mining lak mekah hian heng dan zawng zawng hi bawhchhiat vek a ni,’ a ti.
Tlawng lui chu Riverine Reserve Forest area niin, luia balu leh lui lung an lak avang hian lui kuang nasa taka suasam a nih bakah luia cheng nungchate chenna tihchhiat a ni tih a sawi a. Environment thlirna atang phei chuan lui balu leh lung lak hi thil rapthlak tawpkhawk a ni, tiin, dan pawhin khauh takin a khap reng tih a sawi a. Heng avangte hian district magistrate chuan a thuneihna hmanga a rang thei ang bera stay order pe turin an ngen tih an thlen a ni.