MSL 8 champion Khatla TBL

March 28, Thawhleh zan khan Mizoram Super League (MSL) Season 8 final thawh hnihna khelh a ni a. R. Dengthuama Hall-a inkhel hmuhnawmah takah Khatla TBL chuan champion lai Zarkawt BCA an hneh nawn a, ropui takin an champion. Khatla TBL an champion theih nana thawh hlawk tak Joshua Keyes chu MSL 8 – Most Valuable Player (MVP) ah thlan a ni.
MSL 8 final thawh khatnaah Khatla TBL hian point 76-73 a Zarkawt BCA an lo hneh tawh vangin Thawhleh zan hi champion tur tihchianna a nih vangin mipui an thahnem hle. R. Dengthuama Hall-ah Basketball ngainatute an khat vek a, TV leh Youtube lamah mi thahnem takin an en bawk. Inkel pawimawh takah Khatla TBL in a tawp an khar tha a, point 81-73 in an chak a, ropui takin an champion zui ta a ni.
Beisei lawk ang ngeiin final thawh hnihna hi a hmuhnawm a, team hnihte an inhnehtawk nghal hle. Quarter khatnaah an inum zak zak hnuin point thumin TBL an chungnung a, champion turin rahbi an tuk belh. Quarter hnihna a hmuhnawm leh zual a, an inlehpelh tawn zak zak hnuin point khatin BCA an chungnung a. Point li a hmahruai chungin Khatla TBL in chawlhlawk an hmang ve thung.
Champion nawn leh beisei tura chak ngei ngei mamawh Zarkawt BCA in chak ngei ngei tumin third quarter-ah tan an khawh a, an khel a hmuhnawm viau. Quarter thumnaah hian point thumin an chungnung a, point kha leka hnufual zawk chungin quarter-hnuhnung ber an hmachhawn. Fourth quarter tir lamah inhnehtawk viau mah se boruak sangah BCA in TBL player pawimawh Joshua Keyes an ngam lo. Champion chian nghal tuma thapui thawh TBL hi hun pawimawhah an chetha a, quarter lina hun chanve vel a kal tling lai velin point 10 zetin an sang fal a, champion tur a chiang tan tawh. BCA tan Mizo player pawimawh Lalrina Renthlei hmuhnawm viau mahse an team tlawm tur a chhanhim zo chuang lo. Hun pawimawh takah Joshua Keyes chuan tha zetin block a nei zawn a, BCA beiseina a tihthlawnsak. BCA lam hian TBL nen an inkar tizim hret mahse point 8 in an khingpuite an um phak lova, an trophy kawl mek humhim zo lovin an tlawm ve ta nge nge.
Final thawh hnihnaah hian Khatla TBL player pawimawh Joshua Keyes a chetha fal a. MSL 8 MVP a thlan Keyes hian point 34 zet thawkchhuakin, ball sawhlet vawi 10 zet a lak tling bakah block pawimawh zet vawi ruk ngawt a nei tling bawk. Keyes hian point a thawkchhuak tam a ni mai lova, inkhel entu Khatla TBL supporter te pawh boruak siam turin a kaihruai hneh viau bawk. TBL tan hian Mizo player tha Vanlalthazuala chuan point 15 a thawkchhuak a, Eddie Zaithanmawia chuan point 10 a thawkchhuak ve bawk.
Vawi li zet champion zawn tawh Zarkawt BCA tan player fing Lalrina Renthlei a hmuhnawm viau a. Larina hian point 19 a thawchhuah bakah ball sawhlet vawi 9 a dawng tling bawk. Lalrina hmuhnawm zanah BCA tan foreign player te an chetha tawk lova, an player pawimawh Joseph Allen chuan point 10 bak a thawkchhuak thei lo. Allen leh Patel te an hmuhnawm tawk loh laiin Mathew Sailo chuan point 15 zet a thawkchhuak ve thung.
Mizorama Basketball inelna lian MSL-ah hian Khatla TBL hi vawi thum an champion na niin, Thawhleh zan khan lungthu an kim chiah. MSL season 1 leh 2-ah an champion zawn hnuin kum nga chhung zet an champion thei lo zet a. Kum nga chhung Mission Veng Vikings leh Zarkawt BCA hnuaia an awm hnuin MSL 8-ah vul tharin, par an chhuang leh ta nge nge a ni.
MSL 8 khelh zawh takah Khatla South Barons player H. Lalhmachhachhuana chu rawlthar tha ber (Rookie of the League) ah thlan a ni a. Zarkawt BCA player pawimawh Mathew Remtluanga Sailo hnenah Defensive player of the League chawimawna hlan a ni a. Most Valuable player ah Khatla TBL champion puitu Joshua Keyes thlan a ni ve thung. Keys hian chawimawina dawn a phu zia final thawhhnihnaah chiang leh zualin a lantir.