MSL X kartawp inkhel result

MSL X kartawp inkhel result
Sharda University Mizoram Super League khelh chhoh mek zel a ni a, kar liamta March ni 28 leh ni 29 khan match 4 khelh niin – Saron BC, Chanmari BC, Khatla TBL leh Zarawt BCA-te’n an khingpui an hneh vek.
He inkhel pali result atang hian hneh la nei lo Bungkawn LB leh Electric BC-te chu MSL-a point hmu tlem a hniam pali zingah an tel chiang ta!
A hniam palite tan erawh inkhel pawimawh hmachhawn tur a la awm dawn a, an inkhelh kual hnuah an zinga titha ber tan MSL-ah inhamtan a la theih dawn a, an zinga team pathum erawh MSL atangin an tla thung ang.
Zirtawpni inkhel thlir thuakna
March ni 28 inkhel hmasaah Zemabawk BC lakah Saron BC-te’n 97-82 hmangin hnehna an chang.
He inkhelah hian MSL X coach zinga risk la huai ber leh player thlak kual hlawk ngam hin Saron BC coach, Khatla East pa Lana’n a huaisen rah a tel.
An hnam dang player ai mahin a tualchhung Mizo player-te laka rinna nghattu beisei ang ngeia khel chhuak tha, player of the match T. Lalhriatzela (33 pts) khel a hmuhnawm fal a, point 10 nei tling mi pathum – Elomni (23 pts), A. Tyagi (12 pts) leh Ramdinfela Pachuau (10 pts)-te’n an thawhhlawk hle a; chutih rualin Hunthar tlangval hmeltha Chhanchhuahate ang, langsar vut si lova team tana langsar leh innghahna tlak hi Saron BC player-te dinhmun hrilhfiahna a ni.
Hetih lai hian Zemabawk player pawimawh bik Perkins Jr. hrem a ni a, ani tel lo hian Zemabawk hian beilet viau mah se player fing N. Beniwal (27 pts), captain cool Rozama (22 pts) leh Rinawma (10 pts)-te hi midangin an thlawp tha tawk lova, semi-final lut turin hna hautak zawk hmachhawn an tul phah.
Match hnihnaah erawh team tha zawk Chanmari BC-in Bungkawn LB lakah harsatna tawk lem lovin 83-71 hnehna an chang.
Player of the match Big Mike (35 pts) theihna tak tak kan hmu ta, ani hian inkhel boruak chhungrilah a insawrbing phawt chuan chakpui tham a nihzia a phochhuak nawn.
Chanmari BC hi kal mar pat tura insiksawi fuh ngai team an ni a, he an hnehna chan hi a pawimawh zui ang.
Bungkawn LB erawhin MSL X-a inhamkai tura kechheh siamtrem an ngai takzet.
JS Sylver (36 pts) khel tha tluang mah se Ramthar tlangval Reuben-a (14 pts) bak thlawptu a neih mumal loh an tuar a, thapui an chhuah hle a ngai tawh ang, MSL-a la cham chhunzawm tur chuan!
Inrinni zan inkhel thlir thuakna
March ni 29 zan inkhel hmasa zawkah Khatla TBL chuan Electric BC lakah 90-62 hnehna changin, he inkhelah hian a vawirukna’na MSL X-a hnehna la chang vek Khatla TBL tan hian an rawlthar kut hmui leh za tak Emmanuel-a (22 pts) chu a tum thumna’n player of the match a ni leh a, kar khata tum khat chiah practice off thin Khatla TBL hian semi-final an lut ta.
Electric BC erawh an khel fuh lo zel a, MSL-a inhamtang tura an beih chhunzawm a ngai ang. Tha thar nena relegation inelnaa team dang barakhaih tura an insanmarna’n hunawl an neih chhawr turin tan lak an ngai hle.
Inkhel hnuhnung zawkah Zarkawt BCA-in Champhai BC lakah MSL X-a inhnehna nasa ber siamin, point 40 zet, 115-75 lawihin an chak!
Ramthar tlangval Zonuna (24 pts) chu player of the match a ni a, a khel hmuh a nuamin a ball siksawi a fing thei riau zel.
Lalrina Renthlei (21 pts) leh Cunningham (27 pts)-te’n an thawhhlawk leh fu a; R-a (13 pts) leh Matthew (12 pts)-te hi Mizo top player zinga team-mate-te tana mahni hmasial lo ber zinga mi an ni.
Team inpumkhatna ngaihlutu an coach Marc Tetea hian a naute a ring tawk a, inkhelhna hun tha a siam nawn leh vek.
Champhai BC erawh khelh fuh leh fuh loh tum an neih inkar a inthlau chhunzawm a, DC Franklin (26 pts) leh Ropuia (22 pts) ten thlawptu an nei tawk lo!
Harsh Tomar (10 pts) a insiamrem hlei thei lo va, Sangliana reh zan a ni bawk!
|ang mar pat thei tlona MSL X hi Champhai erawhin mangtha mai an la tum lo, team tha zingah an theihna parchhuahtir turin ngaihtuahna an sen zual a hun.
Hoops Mania Time Out
Zirna in tha kan neih ?thenkhatte’n infiamna lama ti theite pualin an kawngkapui an hawng zau chho zel a, infiamna lama thei chungchuang bikte tan zirna a thlawn liau liaua tihsakte an awm chho ta zel hi infiammi zirlaite tan a hlu hle; an talent ngaihhlutsaktu zirna inte lahin fak an phu.
Chutiang zirna in zingah chuan Goodwill HSS, Mission veng chuan zirlai – admission, monthly fee leh a dangte a thlawn (free)-in an lo tihsak tawh thin chu an kalpui chhunzawm zel a; anni hi high school leh higher secondary lamahte pawh top 10 zirlai lo nei tawh an ni a, bawhzui duh tan admission tih chhoh lai a ni a, biak pawh vat chi an ni ang.
He number (9436986005)-ah hian basketball thiam bikte tan zawhchian theih a ni e.