MSPMC-in kawng siam enfiah

Sumsuih – Turial Link road (RCC pavement) siam mek leh NH-54 Aizawl – Tuipang kawngpui siam meka leivung paihin Serchhip leh Keitum chhehvel a nghawng dan chu Mizoram State Project Monitoring Committee (MSPMC) chuan an secretary Er Vanlalruata Sailo hoin an endik.
MSPMC secretary chuan Mizorama hmasawnna hnathawh hrang hrang dik taka thawh a nih a, a puitlin a, mipuiin kan chhawr tangkai ngei theih nan endik leh ven hnaah sawrkar an tanpui zel dawn a, chutianga thawhpui atan chuan Mizo mipui a sawm tih a sawi a ni.
Sawrkar laipuia Ministry of Tribal Affairs atanga sum hmuh, nuai 426.801 hmanga km.12 a thui siam mek Sumsuih – Turial Link road hi a hmunah an en a, ruahman ang taka a puitlin a, tangkai taka hman a nih theih nan an thil hmuh dante thuneitute hnenah an thlen dawn a ni.
MSPMC team hian NH 54 Aizawl – Tuipang kawng, NHIDCL hnuaia siam mek leivung paihin Serchhip leh Keitum chhehvel ram a nghawng dan an endik nghal a. Kawngpui laihna vung paihna (spoil bank) an siamte a tha tawk em tih uluk taka enin, a bulhnaia huan leh ram a tihchhiat siamthat hna thawh dan an en bakah hmabak hnathawh chhunzawm dan tur an sawipui. Kawng laih hna thawktu Kram Infracon Pvt. (Ltd) hotute bakah New Serchhip North leh New Serchhip South VCP, Keitum VCP te an tel bawk.