Thutak Nunpuitu Team (TNT) chuan an founder Dr Sangthankima’n India ram civil chawimawina sang Padma Shri award a dawn chu Inrinni khan Muanna Venga anmahni hmunah an lawmsak a. Chief minister Lalduhoma leh Home minister K Sapdanga te pawhin an telpui.
Padma Shri Dr Sangthankima chuan he chawimawina a dawn laia a rilrua lo lang chu a pa a ni tih a sawi. “Ka pa khan India President chenna khu a ngaisang hle a, a chanchin min hrilh thin. Chu in ropuiah ngei chuan a fapa sual berin lawmman ka han dawng tur kha ka hnuk a ulh a ni,” a ti. A lawmman dawn lawmna tura sum leh pai thawhtute chungah lawmthu a sawi a, Pathianin a kaihhruai dan chanchin a sawi bawk.
Tuna chief minister Pu Lalduhoma’n tunhmaa ‘foreign contribution’ an hmuh theih nana a lo tanpui tawh dan leh, tuna Home minister Pu K Sapdanga’n a lo tanpui thin dan pawh a sawi a ni.
Chief minister chuan ruihhloin Mizoram a chiah nasat zia chu tlang hriat a ni a, a enkawlna hmun pawh kan nei nual, tiin, heng inenkawlna kan neih zingah rinnaa innghat inenkawlna ten an thawhhlawk hle a, kan tangkaipui em em tih a sawi. Sawrkarna an siam khan mahni in pawh tlawh hmasa loin Tawngtai Bethel Camping Centre a tlawh hmasa tih sawiin, “Thalai ruihhlo ngaite hi kan vei em em a, chhanchhuah tumin hma kan la chho mek zel a ni,” a ti.
Pathian koha rawngbawltute thuawih chu malsawmna a ni a, Pu Sangthankima pawh Pathianin a kohna ang taka hnathawktu a ni tih Lalduhoma hian a sawi a. “Pathian duh dan ang zela kalin Pathian a chawimawi tlat a, nasa takin Pathianin a chawimawi let ve ta a ni,” a ti. Padma Shri lawmna pual hian buhfai bag 10 a hlan.
Home minister pawhin, harsatna tawk mi sing tel enkawl tawhtu Pu Sangthankima hnathawh chu ropui a tih thu a sawi a. A lawmman dawn pawh a phu ngawih ngawih, tiin, “Ani tluka phu hi an awm bik chuangin ka hre lo,” a ti.
He huna report danin, TNT hi Sangthankima (Pa Puia) hian 1984 November 4 khan Champhai daiah a kalpui tan a. A hnuah Aizawl lamah insawnin, Durtlangah bul an tan a, a hnuah tuna an awmna ram hi K Thangzuala’n a hmantir a ni. TNT hian thalai chhanchhuah ngai mi 43355, Pangpar Huanah 2414 leh fahrah 939 an enkawl tawh a. Tunah Addict Centre pahnihah mi 840, Pangpar Huanah 550 leh fahrah 340 an nei. An enkawl zingah hian hnamdang engemawzat an tel. Aizawl pawn lamah Kolasibah mi 367, Lungleiah 720, Champhaiah 320 leh Tahanah 250 an enkawl mek bawk. TNT atanga tha taka enkawl chhuah tawh, TNT worker 94 an awm mek a; TNT atanga pawl 10 pass naupang 184 an awm tawh a, BA leh MA thlenga pass pawh an nei nual tawh a ni.
Padma Shri lawmnaah hian TNT Zaipawl Ropui, TNT Naupang zaipawl, TNT Band ten Padma Shree lawmna hla an rem a, tlaiah ruai an theh a ni.
TNT-in Padma Shri dawn lawmsak
Get real time updates directly on you device, subscribe now.
Prev Post
Next Post