MSPMC project endik ho umzui tha lo insawifiah tir tawh dawn

Mizoram State Project Monitoring Committee chu an chairman, chief minister Lalduhoma kaihhruaiin Zirtawpni khan general body meeting vawi 8-na an nei a. An project endikte umzui dan tur an rawtna ngaipawimawh lo department hotulu ber chu insawifiah tura Committee hmaa koh thin tawh nise an ti.Chief minister hian MSPMC hmalakna chuan rah tha a chhuah nasa tih sawiin, taima taka thawk chhunzawm zel turin a chah a. Hmasawnna hna chak takin kal se an duh avangin project work kalkawng an titawi tih a sawi a ni.
“Tunhma chuan department-in finance-ah allocation an dil a, rei tak file a kal a, chumi zawhah administrative approval an rawn dil leh a, rei tawk tak file a kal a. A dawtah expenditure sanction an rawn dil a, rei tawk tak bawk hun a kal leh a. A tak taka hna kan tan theih hun a tlai thin. Tunah chuan secretary-ten an department project administrative approval leh expenditure sanction an lo pek ve theih dan kan duang ta a. Hei hian nasa takin hmasawnna hnathawh a tichak dawn a ni,” a ti.
MSPMC hian sawrkar kum kalta 2025- 2026 chhung khan project 82 an endik a, an zinga 66 chu project thar a ni. Nikum hmasa lama an lo tlawh tawh an tlawh nawn project 16 a awm. An project endik zara hmasawnna lang ho an tarlang bawk.
Thutkhawmah hian sawrkar kum thar (kal mek) a project endik dan kalphung tha zawk nia an ngaih an sawiho a. Field visit neih chin tur thliarfel dan ruahman a ni. An hmalakna zau zawka puan chhuah dan leh media mite nen thawhhona tha zawk neih dan tur an ruahman a. An project endikte umzui dan tur an rawtna, a mawhphurtu department-a an thlenten ngaihpawimawh a hlawh lehzual theih dan pawh sawiin, an thurawn ngaipawimawh lo department chu an hotulu berte Committee hmaa insawifiah tura koh thin ni tawh se, chumi hnua la bawhzui tha lo chu an chunga hremna lek tura sawrkara thlen zel nise, an ti.
Heng bakah hian, tuihna a pun theihnan CAMPA Fund hmanga hmun thlan bik thenkhata afforestation kalpui dan dap tha an ti a. Annual Report 2025- 2026 siam leh tur niin MSPMC pualin portal neih ve nise an ti bawk.
MSPMC hian member thar pahnih a nei a, Mizoram Kohhran Hruaitute Committee secretary Rev Lallawmthanga leh Central YMA treasurer Er H Duhkima an ni.