MSSSB din chhan kha a dik lo – Lalduhoma

Mizoram Subordinate Services Selection Board (MSSSB) kha a that em em rualin, induhsakna awm theihna a ni tih a chiang a, chu chu an din chhan pawh a ni tih phat rual a ni lo tih chief minister Lalduhoma chuan a sawi.
Tunhnaia thuthar thehdarhtute a kawmnaah chief minister chuan, sawrkar hmasa in Mizoram Public Service Commission ni lo, hna latu dang siama MPSC a lo chhawk kha thatna em em a neih rualin, hmansual theih a ni a, ruling party-in duh ang anga an thunun theih ‘body’ a nihna lai kha a him loa, chu chu an thiah chhan a ni tih a sawi.
“Thildangah kan duh lo a ni lo, khati ang kan neih kha chuan hna lak a fair thei dawn loa, political appointment a awm thei dawn lutuk tih kha thil chiang sa a ni. Chu rilru avanga din pawh a ni tih phat rual a ni lo,” a ti. Hei vang hian ram tan a hrisel loa, rorelna tha a awm thei dawn lo niin an hria tih a sawi.
MSSSB an tih tawp khan nasa takin MPSC an thuamtha a, physically pawhin an ti a, manpower an pek belh bawk a, amaherawh chu ZPM sawrarin hna an lak tam tak em avangin an indaih lo tih a sawi. Theih ang angin thuam chhoh leh an tum a, member pakhat hmun ruak pawh hnawhkhah an tum tih a sawi a ni.
Zawhna chhangin chief minister chuan, Mizoram Resource Mobilisation Committee an din chuan sum lakluhna tur a ngaihtuah rualin tul lo leh hlawk lo zawnga sawrkar sum kalral tur venna atan rawtna a siam thin tih a sawi a. Inrenchemna kawngah anmahni’n bul tannin, an sawrkar tirh atangin chief minister leh minister-ten an entitlement atangin a zat ve ah an tihniam a, tih a sawi a. Grade IV an kawl theih zat pawh tihniamin, anmahni atanga bul an tan miau avangin officer-te ah pawh ti ngam turah an inngai tih a sawi.
Police department bikah pawh hei hi an kalpui tawh hnu ah tunhnai hian police lalten an naute an kawl theih dan chu ennawn leh niin, mi 100 velin an tihniam leh dawn tih a sawi a. “Lawm loh theih tak pawh a ni anga, amaherawh chu hetiang hi ‘reform’ kan kalpui mek hnuaiah zel a ni a, sawrkar hnathawkte thlawpna kan dawng tha em em a ni,” tiin Lalduhoma hian zawhna a chhang.
Chief minister lirthei kawl zatah thudik famkim loa puh a ni fo thin tih a sawi a. Tunah hian lirthei pakhat a nei a, spare car erawh security thilah neih ngei ngei ngai a nih avangin a nei a, a bak a nei lo tih a sawi. “Lierthei pakhat chauh ka nei a, pakhat dang kawl anga min puh talh hi chu spare car a ni. Chief minister spare car nei lo khawp chu security thilah khawvelah a awm thiang lo,” a ti.