MSSSB hi hna pek belh an ngai zawk e

Fela Khiangte

Sawrkar a din chhung chuan hna lak hi a awm reng dawn a. Sawrkarin policy a duante ti hlawhtling turin hna thawk mi engemaw zat rawih an ngai reng a. Chutiang a nih avang chuan hna latu bik tur commission emaw, board emaw, committee emaw din a ni thin a ni. Mizoramah chuan Group A hna leh a chunglam leh Group B Gazette hna te la turin sawrkarin MPSC a ruat a. Group B hna la turin MSSSB te ruat an ni bawk a. Group C leh D hna la turin department tin tan Departmental Screening Committee an awm leh bawk a ni.
Tuna kan sawrkar thar hian an sawrkar ni atanga ni 100 chhunga tih hlawhtlin tur tha tak tak ruahmanna an siam a. Amaherawh chu chung an tih hlawhtlin tur zinga pakhat chu Group B hna latu MSSSB thiah a ni tlat mai a. Mi a barakhaih hle. Hna zawngtute hriat danah leh hmuh danah fair leh thianghlim taka hna lak kalpui thin a ni tia hriat an nih laiin thiah tur a lo ni dawn ta mai hi mi tam zawk mak tih a tling a. A phena thu ruk inthup a lo awm a nih chuan mipui te hian hriat kan chak hle a ni.
Hna lak dan a muan hian a tuartu chu mipui te, department-te leh hna zawngtu leh diltute an ni a. MSSSB hna hi MPSC kutah dah lo ni dawn ta se, hna lakin a khawmuan phah leh hlein a rinawm a. MPSC tih len a ngai ngei anga. Hna thawktu thar an lak a tul ang a, thawktute room tur siam belh a ngai dawn bawk a. Mipui sum tam tak a kal ral ngei dawn a. A ngai angin MSSSB hi awm chhunzawm se kan thatpui zawkin a rinawm.
Group C leh D hna lak hi department tinin a hran theuha an buaipui hian hun leh tha leh sum a hek phah hle. Group C hna lak bikah hian written exam neih phawt hnuah chuta titha zualte chu personal interview tura koh thin an ni. Tunlaiah hna a vâng a, hna diltu an tam thin si a, hna pakhat chauh lak tur leh hna sawm chuang lak tur buaipuina atana sum leh tha senso hi a inzat deuh reng ang. Department-in hna a lak hian insawipui theihna remchang a tam hlein a lang. Sawipuitu nei ve lo hi a tam zawk kan nih thin avangin fair leh thianghlim taka hna lak a nih theih nan Group C hna lak pawh hi MSSSB kutah hian pek belh ni zawk se.
Group D hna lak hi hun engemaw chen kha chu written exam leh personal interview hmanga felfai taka kalpui thin a ni a. Ni 28.4.2020 atang khan hei hi rawn tidanglamin personal interview hmang chauha hna lak hi kalpui a ni ta a. Interview hian mark 100 a pu a. Sawipuitu tha inrawlh theihna remchang a sang em em mai a. A tuartu chu mirethei, chhung leh khat nei tha lote bawk an ni a. He tiang thil fel lo pumpelh nan hian Group D hna lak pawh hi a hmaa lo tih thin dan angin written leh personal interview hmanga kalpui leh ni se. Hna lak hi MSSSB kutah bawk dah ni se a felfai berin a rinawm.