MSSSB thiah tur sawinawn SEDP zirtirtute ennawn ang

Mizoram Subordinate Selection Board chu thiah a ni dawn tih chief minister Lalduhoma chuan a sawi nawn a. SEDP zirtirtute chu sawrkar kum kal mek chu chhawr an ni phawt anga, a hnu lam chu ennawn an nih tur thu a sawi.Ningania Assembly Session-ah larsap thusawia lawmthu sawina tur motion putluh sawihonaa member thenkhat thusawi a chhannaah House leader Lalduhoma hian Mizoram Subordinate Selection Board (MSSSB) chuan exam buaipui mek a nei a, an zawh hunah an thiat dawn tih a sawi. MSSSB thawktute an fel lo an tih vang niloin, MPSC ring tawk loa political appointment tih theihna remchang tak system thar introduce chu tha an ti lo tih a sawi.
He Board hnuaia hnalakah hian thil fel lo tak tak a awm tih an hria a, a then phei chu sawi tlak pawh ni mang lo a nih thu sawiin, “Hei hi a din reng chuan sawrkar apiangin remchangah an hmang duh anga, political qualification atanga inhnawhluh tumna a awm anga, hei hi kan ram ti khawl lo tu a ni. Political appointment avangin sawrkar hnathawk quality hi a chhe thui tawh a. Chutiang ti duh tana tih mai theihna system a ni tlat a ni,” a ti.
MPSC chairman hnenah MSSSB lo chhuahna hi an indaih loh vang a ni em, tih a zawhnaah, indaih loh an neih loh thu in a chhang. An hna an zo lutuk a, an mamawh thlen tura a tih pawhin staff dil belh lam a awm lo tih chief minister hian a sawi. “An hna a lo hautak chho zel a nih chuan MPSC hi kan thuamchak mai zawk dawn a ni,” a ti.
Cabinet-in SEDP zirtirtute chungchang a ngaihtuah a. Sawrkar kum kal mek tawp thlengin chhawr zui tum an tih a sawi. An zingah qualify lo tam tak, kal zel tlak lo an awm nia sawiin, dan ang thlapa lak ni lo, party-in advertisement chhuaha party lakte an awm tih sawiin, “An thawk zui anga, tun financial year bak erawh School Education minister-in tul a tih angin a kalpui turah kan ngai. Mi qualify lo te, an hnathawhna hmuna awm chuang lo, aikal lo la leh ta te, an awmna tur ni loa awm ta daih te an awm,” a ti.
Guarantor-a tan an sawi chu an ti dawn tih sawini, “MSME hnuaiah hian tunah a theih sa reng. Awareness a awm loa, sawrkar atangin awareness kan inpe lo bawk a. Kan entreprenuer tam takin hei hi an chhawr lo a ni. Keini chuan kan uar dawn a, a kum khatna turah chuan state sum hman pawh a ngai lo. Central scheme-ah hian guarantor awmsa a awm a, loan provision a awmsa a, margin money leh subsidy a awmsa vek a, hei hi convergence-in central scheme awmsate nen kalpui kan tum,” Lalduhoma hian a ti.
Resource mobilise dan ngaihtuah chu department dinna thamah an ngai loa, department-a din tura tihfel tawhna pawh thiahna tur order a pawm tawh tih a sawi. “Committee a tawk a, chu pawh rei tak a din a ngai loang. Hetiang ram zim leh mihring tlem si ah tuna department neihte pawh sawikhawm leh ila tih nak laia, a thar hawn belh hi fuh kan ti lo,” a ti. Committee-ah hian chief secretary hlui, IAS retired vice chairman-ah an dah anga, a hautak lo thei ang berin, thla tin cheng khat hlawhin an hmang dawn tih a sawi.
Raltlante sawrkarin a ngaihtuah chhunzawm zel dawn a, Manipur buaina chungchangah Union Home minister nen an inbe tawh a; Myanmar buaina chungchangah External Affairs minister nen an inbe tawh bawk a, India sawrkar ngaihdan hrechungin, mizoram sawrkar resource-in a tlin ang zela chhawmdawl hna hi an thawk zel mek tih a sawi a ni.