Mualkhang Bottling Plant zo hnai

Home minister K Sapdanga chuan Zirtawpni khan Mualkhang Gas Bottling Plant a tlawh a. Eirawngbawlna gas hnianghnar zawk neihna atan he Plant tihchangtlun mek a ni chu lawmawm a tih thu sawiin, gas bur buk tling lo awm thin tihbona atan hmanraw tangkai a nih a beisei thu a sawi.
Mualkhang Gas Bottling Plant tlawhnaah hian Food, Civil Supplies & Consumer Affairs minister B Lalchhanzova chuan, Aizawl khawpui leh Mamit chawm thei tur piped natural gas kalpui turin ruahman a ni tih a sawi a. Ruahmanna tluang taka kalpui a nih chuan kum 2027 hian Sihhmui a thlen theih beisei a ni tih a sawi. Mualkhang Gas Bottling Plant tihchangtlun hna thawh zawh a nih chuan, nitin gas cylinder 7500 vel thleng ziah tawh tura beisei a ni, tiin, hei hi eirawngbawlna gas hnianghnar zawk kan neih theihna tura hmalakna a ni tih a sawi.
IOCL deputy general manager Z Lhungdim report danin, he Plant boundary hung leh retaining wall siam hna chu zaa 90 vel zawh tawh a ni a; land development hna zaa 75 zel zawh a ni tawh. Heng hna hi kumin July 21 hian zawh hman beisei a ni a, a vaia zawh hna hi chu kum 2028 February-a zawh hman beisei a ni. Tuna hna kal mek zawh hnu ah mounted storage vessel bun a ni dawn a, ruahman dan chuan metric ton 900 dawl zo tur niin, nitin LPG cylinder 7500 vel dawng zo tur a ni. Kangmei chhuah palha thelhna tur tui kilolitre 6000 dawng tuizem sak a ni dawn a, contract staff mi 50 vel mamawh a ni ang.