Muallungthu lamah lirthei tan kawng hawn hun siam

Central Medical Warehouse panna kawng Muallungthu ami chu siam hna thawh mek a ni a, he kawng siam hi Muallungthu – Khumtung panna kawng chung zawn a nih avangin lung leh lei tla laka he lai kawng paltlang tur lirthei leh mipui him zawk nan PWD hotute ngen angin Aizawl Traffic SP chuan dan tlawhchhanin kawng hawn leh khar hun a siam a. Hei hi kumin February 19-a helai kawng hawn leh khar hun a lo siam tawhna chhunzawmna a ni.
Kawng hi zing dar 6.00 to 8.00 chhung khar a ni a, zing dar 8.00 to chawhma dar 10.00 thleng hawn niin, chawhma dar 10.00 atanga chawhnu dar 2.00 thleng khar a ni a; chawhnu dar 2.00 atanga tlai dar 5.00 inkar hawn a ni. Tlai dar 5.00 atanga zan dar 7.00 thleng khar vleh a ni a, zan dar 7.00 atanga zing dar 6.00 inkar hawn a ni.
He thupek hian chhiatrupna thil – kangmei leh emergency kaihhnawiha duty, dan leh thupek pawimawh bika police leh magistrate duty-te chetvelna a huam lo a. Hnathawhna hmun paltlang lirthei veivak enkawl chu PWD mawhphurhna a ni. Thupek hian March 22 atanga April 16 thleng a huam a. Thupek bawhchhia chu u/s 179 MV Act 1988 hmanga hrem theih an ni tih a sawi.