Mualpho thup nana Duhoma beiah MNF puh

ZPM |halai chuan thuchhuah siamin, MNF party chu an mualpho thup nana Lalduhoma beiah an puh a, “Mipuiin dawta innghat party sorkar an paihthla dawn,” an ti.
“Tun hnaiah rorel lai MNF party-in thudik lo hmanga ZPM chief minsterial candidate Pu Lalduhoma an bei ta ngat ngat mai hian manifesto thar zawrh tur an neih lohzia a tarlang a. ‘I eiru em?’ tih zawhna chhang thei lo hruaitu hnuaia kal ngaihna hre lo party-in sum chheprelh anga Pu Lalduhoma an puh ve ngawt mai hi ZPM |halai chuan âwm lo kan ti hle,” an ti.
“Serchhip bialtu MLA Pu Lalduhoma hian MLA fund hmang hian a bial chhunga mi harsa leh a mamawhtute tan nasa takin hna a thawk a. A hrechiang bertu chu a bial mipuite an ni.
MLA zin loh bill la, kir leh ta hauh lote chungchang sawi ngai lova, thil tha zawk duha kir leh ta chungchang an sawi duh viau mai hian dikna lama an thlen chin tawizia a tarlang chiang hle. Pu Lalduhoma chungchang an tarlan ang hian, zin loh bill late zawng zawng, thlei bik nei lova phochhuak ngam turin kan phut a ni,” an ti bawk.
“Serchhip bial mipuiin duh tak leh hneh taka an thlantlin Pu Lalduhoma hian a biala awm ngam lohna tur emaw tlawh ngam loh tur chhan engmah a nei lo. Mipui sorkar din a nih ngei theih nan Zoram dung leh vangah a tlangau mek zel a. A bial mipuite’n amaha an rinna tichhe thei khawp eng thil mah a tihsual loh avang leh hlemhletnaa a fihlim tlat avang hian hneh taka thlan tlin a nih leh ngei kan ring tlat a ni,” an ti bawk.