MUCHS kan kalpui danah hlauhthawn lutuk tur awm lo: – Health minister

Sawrkarin Mizoram Universal Health Care Scheme (MUCHS) a kalpui mekah contribution hrang hrang leh budget-a dah bakah Asian Development Bank atanga sum an puk nen, sum indaihlohna lamah hlauhthawn lutuk tur a awm lo tih Health minister Lalrinpuii chuan a sawi.Ningania Assembly Session-ah zawhna chhangin Health minister chuan, MUCHS contribution-ah hian sum hmuh tur Rs. 482,54,07,538 atangin Rs. 154,37,02,418 an hmu tawh tih a sawi. Contribution hi state grant atangin vaibelchhe 60, sawrkar hnathawk contribution Rs. 11,99,50,035; corpus fund interest vbch.12; ministry atanga AB PMJY fund hmuh Rs, 21,83,42,000; fixed deposit redemption Rs. 9,14,01,024; state grant (2024-25 back log) vbch. 13.50; AB PMJY clearance-ah vbch.13.80; enrolment fee-ah Rs. 6,54,59,899 hmuh a ni tih a sawi.
“Package rate tha taka kal hian, kan fund hmuh tur kan budget ami zawng zawng nena belhkhawmin, March thlenga pekchhuah tur chhut lawkin, sawrkarin cheng vaibelchhe 100 chuang a hum thei dawn a. ADB loan kan lak kim hunah chuan vaibelchhe 1000 dawn a nih avangin a interest ringawt pawh a thlamuanthak dawn a, MUCHS kan kalpui danah hi chuan hlauhthawn lutuk tur a awm lo,” a ti.
2023 ZPM election manifesto angin, MUCHS-ah engtik lai pawha inziahluh theih tura hawn reng tumna a awm lo, tiin Lalrinpuii hian zawhna a chhang bawk a. Sawrkarna an chelh hnu ah an han zirchiang a, insurance company ho kalpui dante an enchiang a, engtik lai pawha inziahluh theih hi thil harsa tak a nih avangin an ti ta lo tih a sawi.
ADB atanga health care atana sum puk chu sawrkarin corpus fund atana dah tura thutlukna a siam avangin MUCHS inziahluhna fee tih hniam tumna a awm lo tih minister hian a sawi a. MLA-te chu an biala khawsak harsa deuhte inziahluh man tumsak turin a ngen tih sawiin, hetianga tumsak mek hi an awm nual tih a sawi a ni.