Muga silk-ah in dinhmun a tha Inkalpawhna lam hawngzau zel – MoS Pabitra Margherita

Muga silk-ah in dinhmun a tha
Inkalpawhna lam hawngzau zel
– MoS Pabitra Margherita
Sawrkar laipuia minister of state for External Affairs leh Textile Pabitra Margherita chuan Mizoram chu Muga silk khawi lamah a dinhmun a tha hle tih a sawi a. India leh khawvel nena inkalpawh tawnna lamah sawrkar laipui chuan kawng a rawn hawng zau ta hle tih a sawi bawk.
Zan riaka Mizoram tlawhtu MoS for Textiles hian chief minister nen an inbia a, state sawrkar, BJP Mizoram leh heti lam buaipuitu dangte hnen atanga a dawn danin, Mizoram chu silk pangang khawina atana hmun tha, thenawm state – Assam leh Meghalaya ang thoa Muga silk tam tak tharchhuak thei a ni tih a sawi.
Textiles ministry chuan handloom sector-ah la hmanga eizawngte chawikan zel kawngah ruahmanna a siampui thei reng tih a sawi a. Handloom hmanga eizawnna chu, hmun kilkhawr ber ami pawh nise, khawpui lian leh khawvel hmun dang nena inthlunzawm a ni tih a sawi a. Kuta tah/siam puan chu tunlai thiamna nena siamchhuah nen inhlawk hleih viau mah se, a hlut zawk avangin khawvelah ‘demand’ a sang telh telh tih a sawi a ni.
India hmarchhakah hnam leh chi 200 chuang awmte chu handicrafts leh handloom lamah mahni hnam bil thil nei vek an ni a, hmarchhak hausakna a ni, tiin, Ministry of Textiles pawhin heti lamah hian nasa zawka hma rawn lak zel a tum tih Pabitra Margherita hian a sawi a ni.
Mizoram chu hmarchhak state dang ang bawkin, sector hrang hrangah theihna nei sang tak a ni a, India zalen atanga kum 60 hnua hmasawnna hmel hmuh tur la tam lo tak kha Prime minister Modi hnuaiah hmasawnna tam tak a thleng tawh tih Union MoS hian a sawi.
Inkalpawhna lamah pawh Mizoram chuan ramchhung hmun dang nen zau zawka inthlunzawmin, rel kawng bakah kawngpui tha zawk nen, thlawhna hmanga inkalpawhna thlengin tih changtlun zel a ni tih a sawi a. Inkalpawhna mai niloin hmasawnna ruhrel dang din kawngah pawh nasa takin a thang chho mek tih a sawi bawk.
Insumdawn tawnna lamah Kawrpuichhuaha Integrated Check Post chu a taka kalpui thuai a ni dawn a, Ministry of External Affairs chuan heti lam kawng hrang hrangah a tul angin a tih tur a ti chho zel dawn tih a sawi a ni.