MUHCS hmangtu Kolkata damdawi in pahnih tlawh

Kolkata-a damdawi in pahnih, Mizoram Health Care Scheme hman theihna zinga Mizo damlo refer tamna chu Inrinni khan Health & Family Welfare minister Lalrinpuii chuan a tlawh.
Damdawi in a tlawh hmasak zawk, RN Tagore Hospital hi lung leh kal thlak lama damdawi in experience nei tha tak niin, Civil Hospital Aizawla kal thlak theih tawh tura puitu hospital a ni. Tunah hian Civil Hospital doctor leh thawktu dangten training thawhkhatna an zo tawh a, a thawhhnihna neih tum leh mek a ni.
Damlo refer-te lo enkawl bakah Tagore Hospital leh Mizoram damdawi in chuan Mizoram sawrkar damdawi in tihchangtlunna tura hmachhawp hrang hrangah thawhhona tam zawk neih a duh tih Health minister hian a sawi a. Damdawi ina awm mek Mizo damlote pawh harsatna an neih leh neih loh zawtin, a kan nghal a ni. Damlo nunna chan an awm palh a, death certificate pek chhuah muang deuh hlek thin chu a rang thei anga pe chhuak turin Hospital hotute a ngen bawk.
Hemi hnu hian Manipal Hospital EM Bypass Road a tlawh a. Cancer lamah super speciality hospital niin, khawl thar tha ber ber nena thuam an nih avangin cancer enkawl kawngah chuan an rintlak tih an lo hrilh. ICU leh Radiation Wing a tlawh nghal bakah damlo inenkawl mekte pawh kanin, harsatna an neih leh neih loh a zawt. Manipal Hospital hotute chuan an hospital hrang hranga damlo an enkawl dan, super speciality branch an neih ho an lo hrilhfiah a. Damlote chu theihtawp chhuaha an lo enkawl thin thu sawiin, theihtawp chhuah chhunzawm zel an tum tih an sawi.
Mizorama Nursing College hrang hranga campus recruitment neihpui atan minister hian a sawm a. An ni pawhin Manipal Hospital hrang hranga thawk turin Mizo nurse tam zawk an mamawh tih an sawi a ni.
Minister hian Inrinni khan Delhi a pan a, vawiin – June 29 hian Union Health minister hoa 16th Conference of the Central Council of Health & Family Welfare thutkhawmah a tel ang.