MUHCS sawichhiat mipui zahlohna – Lalrinpuii

MUHCS sawichhiat mipui zahlohna
– Lalrinpuii
AMC inthlan neih tura an party tana street campaign neihah ZPM hruaitu, minister Lalrinpuii chuan, MUHCS chungchangah Congress party chuan, rintlak loh, ‘health scam’ ti zawnga thuchhuah a neih thu sawiin, kohhran pawhin MUHCS a rintawk avanga thuchhuah an siam lai a, heti zawnga thu an sawi duh chu mipui zahlohna lian tak a ni tih a sawi.
Mizorama private hospital-te phailam hospital nena inremna aia hniama an tih theih thu an hrilh pawha phal lo ni awma an sawi thu pawh sawichhawngin, “Private hospital-te nen hian tum engemawzat indawr a ni a, hospital mal leh pawl (NGHAM) ang pawhin minister hoin, secretary & commisioner hoin, CEO nen pawh sawiho fo a ni a. Tunhnai chhoah hospital tinte CEO office-ah leng tura sawm an ni a, rate chungchang pawh sawipui an ni. MUHCS kalphung hi package system a ni a, private hospital lam hian an rate ang ang atanga 10% a hniamin min offer a, mahse chu chu package system a nih loh avangin package system turin lo siamtha leh rawh u kan ti a. Hei hi a chhanna kan nghak mek,” Lalrinpuii hian a ti.
Phai rate leh Mizoram rate chu khaikhin fo a ni tih sawiin, “Private hospital-ten lo hrethiam se, an ni (phai) nen chuan specialities-ah, super specialities-ah, kan facilities neihte a inthlau em a, an rate aia hniam tih pawh hi eng ang taka hniam nge tih sawichian awm lo,” a ti bawk.
Mizoram sawrkarin tunah hian bill a neih ang ang chu a clear zel tih minister hian a sawi a. Thawktu lam indaih lohna avanga process mek pawh awmin, sawrkarin bill pek tur hi a nei a, thlaphanna tur a awm lo tih a sawi. MUHCS chu scheme langtlang a ni, tiin, empanelled list, bill pek tawh zat, guidelines, circular leh notification adt. State Healthcare Society website-ah en theiha dah a ni tih a sawi a ni.
Master package rate chu mipui hmuh theih tura an dahchhuah vek tawh laiin, private hospital hrang hrang dinhmun inanglo tak tak, that dan inanglo tak tak, facility neih inanglo tak tak nena inremna bik, ‘commercial confidential secrets’ kaihnawih thil chu MoU ziahnaah ‘confidentiality clause’ a awm tlat avangin puanzar a rem lo tih a sawi a. Inziahluh man chungchangah Golden card neiten sum tak senga inziaklut anga sawi chu a dikloh zia hretute chu Golden card neitute an ni a, Golden card neite a hrana inziahluh a ngai lo tih a sawi.
Phai lama deemed empanelment leh reimbursement chungchangah thu dik lo sawi a ni bawk tih Lalrinpuii hian a sawi a. Phai deemed empanelled hospital hi MUHCS rate ang emaw a aia hniam emaw an pawmpui thei a, mah se, cashless kalpui thei lote an ni tih a sawi bawk.