Mumang ramah Mboko cheng zui zel!

Mumang ramah Mboko cheng zui zel!
Montreal khawpuia Canadian Open hmeichhe singles inelna kal mekah tualchhung mihang tleirawl Victoria Mboko chuan fourth round lama two-time major winner Coco Gauff a barakhaih hnuah duhtawk a la ngah lo a, quarter-final match pakhatah 6-4 6-2-a Jessica Bouzas Maneiro hneh lehin semi-final hial a thleng ta!
World number 333-na ni chungin kumin kum bul tan ve leih leih Mboko hian lasi thawnthu ang maia mumang duhthusam a kalpui mekah 2022 Wimbledon champion Elena Rybakina a hmachhawn leh dawn a, WTA 1000-level semi-final a luh vawikhatnaa a hmachhawn tur hi a hra wleh khawp mai a, engnge a an leh dawn kan thlir ang.
Canadian tleirawl kum 18 mi hian Spaniard Jessica-i lakah harsatna lian a tawk lo a, final luh inchuh match pakhat zawka a sut leh tur ninth seed Rybakina nena an khelh tur last four match chungchang on-court interview-ah sawiin, “He hmuna semi-final ka khel tur hi ka phur tawh takzet a; Montreal-a ka inkhelh vawi khatnaa ka tawnhriat hi a tak a ni lo mai ang em tiin ka ngaihtuah rum rum a, tun aia lawm lehchuan ngaihna a awm tawh lo,” a ti chhuak hial!
World number 85-na ni mek Mboko hian hmeichhe tennis inelna level hniam zawk ITF Tour-a title panga a lakna kawngah kumin hian match 22 a chak zawn tling a; kumin March thla khan a WTA Tour debut a nghakchhuak ve chauh a; karleha ranking thar an tarchhuah hunah chuan top 50 huang a luah chho ve tawh dawn a ni.
Grand Slam a hmachhawn vawi khatna kumin French Open-ah khan beiseiawm taka inlan nghalin third round a thleng a; Wimbledon-a a opening round-ah 25th seed Magdalena Frech a vaw tla leh ngat bawk!
An ram leilunga US Open inbuatsaihna tournament level sangah inlan mekin, kum 2019 champion Bianca Andreescu hnu lamah Mboko hi Canadian zinga he tournament semi-final thleng leh thei hmasaber niin, kum 2015 daih tawha record rawn siam Belinda Bencic hnu lama last four lut thei hmeichhe player naupang ber a ni nghal bawk.
Tarlan tak angin, semi-final match pakhat zawka Mboko tum leh tur ninth-seeded Kazakh Rybakina lakah hian thla hmasa Washington Open second round-ah Canadian mihang tleirawl hi a lo tlawm tawh a, tuntum pawh hian rinkai lo zawk a nih leh phawt a ngai!
Russian-born Kazakhstani professional tennis player Rybakina hian quarter-final match pakhatah Marta Kostyuk hmachhawnin, 6-1 2-1-a hma a hruai laiin a tumpui Ukrainian hi banrek na avangin a inhnukdawk a, hahdam zawkin semi-final a lut.
Toronto khaw lama Canadian Open mipa singles khelh mekah kum 2017 Canadian Open champion Alexander Zverev chuan 6-7 (6-8) 6-4 6-3-a defending champion Alexei Popyrin hneh chungin semi-final a lut a, a career-a ATP Tour last four tum 75 a thlenna chiah niin, mipa player la inkhel mek zingah heti ang mellung phun thei midang awmchhun chu Novak Djokovic chiah a ni.
Thla hmasa maia Wimbledon first round paltlang zo lo kum 28-a upa German top seed Zverev hian final luh inchuh match pakhat zawkah Russian Karen Khachanov a hmachhawn dawn a, Khachanov hian last eight match danga 6-4 7-6 (7-3)-in Alex Michelsen of the United States a hneh ve bawk.