Mumbai-a naupang 17 hren chhanchhuak, a hrengtu kap hlum
Mumbai-a naupang 17 hren chhanchhuak, a hrengtu kap hlum
Mumbai-a Powai vengah Ningani khan mipa pakhatin naupang 17 a hreng nia hriat a ni a, police-in chhanchhuah tuma an beihnaah an kap hlum a, a mi hrente pawh hima chhanchhuah an ni.
Police chuan Rohit Arya-a hian air gun-in a lo kap a, vawi khat an kap let ve a. A awm ding lamah fuhin enkawl a nih laiin a thi a, a ruang hi JJ Hospital-ah endik a ni tih an sawi.
He thil thleng hi studio lian lo tak, RA Studios-a thleng niin Arya-a hian ‘chhimtute’ tiin naupangte hi a hruai lut a. Police chuan kum riat leh 14 inkar naupangte hi darkar hnih chuang a hreng hman niin an sawi.
Powai Police Station-a miten chawhnu dar 01:45 vela an hriat hnuah an pan nghal a, an dawr hnuah pawh a chhuah duh lo va. Tihnat a tum chuan police team hian bual pindan atangin an luhchilh zui ta a ni.
Police-in an luhchilh hmaa Arya-a’n video a tihchhuahah chuan ‘mahni intihhlum ai chuan mi hren’ chu a duh zawk tih a sawi.
“Rohit Arya-a ka ni a. Intihhlum mai aiin heng naupang thenkhat hi hren ka thlang ta zawk a ni,” a ti a. A lakah thil tha lo an ti a nih an tithinrim dawn tih pawh a sawi a, a hrenna hmun chu halah a vau va, pawisa a dil lo va, ‘mi firfiak a ni lo’ tih a sawi bawk.
“Inbiakna mawlmang tak chauh ka duh a, chu chu naupang ka hren chhan a ni a. Mi ka hren hi ka ruahmanna peng khat chauh a ni a. Ka dam chuan ka ti dawn a, ka thih pawhin mi dangin an rawn ti tho dawn a ni,” a ti.
Police chuan a air leh bawlhlo bawm an hmu a, chhuitute chuan officer-te vau nana a hman a nih an ring a. Naupangte hi studio-ah hian web series audition chhim tura sawm niin Powai venga mi chenna chhawng hnuai bera awm a ni.
A hmain Arya-a hian department-in sanitation campaign pakhat, Chief Minister’s My School, Beautiful School campaign hnuaia siam, PLC Sanitation Monitor Project-a a sum hlawm tur an batsak niin a sawi bawk a. Project hi kum 2013-a a tan, ‘Let’s Change’ campaign hnuaia a thawh niin sikul naupangte chu ‘ambassadors of cleanliness’-a siam tura beihpui thlakna a ni tih a sawi.
Department hian Rs vaibelchhe 2 pek an tiam a; mahse, January, 2024 thleng khan an la pe lo tih a sawi a. Hemi kum hian vawi hnih chaw ngheiin a nawr a, hetih laia education minister, Deepak Kesarkar-a’n ngaihven viau mah se thuneituten an ngaihsak zui lo niin a sawi bawk.
Arya-a hian Kesarkar-a hian cheque pahnih, Rs nuai 7 leh Rs nuai 8 a lak theihna tur a pe a, a dang pek a tiam bawk a; mahse, intiamna erawh a hlawhtling vek lo tih a sawi.
Maharashtra Education Secretary Ranjit Singh Deol-a erawh chuan Arya-a pawisa pe turin inremna engmah siam a ni lo tih a sawi a. “Hna thawk tur khan a inpe a, a thawh that avangin certificate pawh hlan a ni a. Sorkarin ‘My Shala, Sundar Shala’ programme a kalpui theih nan pawh a dawr zui a; mahse, a hlawhtling ta lo va, Maharashtra sorkarin Arya lakah ba kan nei lo,” a ti.