Mumbai khawpuiah ruah sur nasa

Nasa taka ruah surin Mumbai a nuai hnuah Chief Minister Eknath Shinde chuan mipuite chu tul tawpah lo chuan chenna in chhuahsan lo turin a ngen a. Police Commissioner pawh beach bul hnaiah tumah an kal remti lo turin a ti bawk.
Mumbai hmun thenkhatah chuan ruahtui 300mm lai dawngin tuihawk turu lutuk chuan rel leh thlawhna thlawkchhuah tur te a tibuai hneh hle a ni.
Rel kawng te chu tuiin hmun tam takah a chimpil a, NDRF leh civic official-te chuan tui pump chhuakin rel te erawh tlantir zui theihin an awm thung.
“Municipal corporation motor pump 361 hmangin leh Railways te pump 200 hmangin tui te hi pump chhuah a ni a, rel te pawh an tlan leh thei tawh a ni. Department tin te ka be vek a, Central leh Harbour rail line te a tha leh tawh bawk a. Coastal area lamah chuan orange alert tihchhuah a ni thung a. Army, Navy leh Air Force te pawh inring tura tih an ni” tiin Chief Minister Eknath Shinde chuan a sawi.
Chief Minister chuan tuiin a chimna hmunah civic official te tirhluh an nih thu sawiin school te khar niin agencies tin te chu thil duhawm a thlen loh nana inralring reng tura tih an nih thu a sawi bawk.
Mumbai hi India khawpui zinga micro-tunneling nei awm chhun a ni a, hei vang hian tui tling te thenfaina lamah a pui nasa tiin a sawi bawk.
Mumbai hian darkar 24 chhungin ruahtui a dawng nasa hle a, Mumbai, Thane, Palghar leh Konkan Belt ah te chuan Orange alert tihchhuah a ni hial a ni.