MUP Branch tin hnenah upa tan hmun remchang siam turin chah

MUP Branch tin hnenah upa tan
hmun remchang siam turin chah
Upaten anmahni awmhmun ngheta upat lam hun hahdam leh hlim taka an pan theihnan MUP Branch tinin hmun remchang buatsaih turin Social Welfare minister Lalrinpuii chuan a chah.
Directorate of Social Welfare, Mizoram Upa Pawl leh Directorate of Ayush tangho buatsaihin Thawhlehni khan Aizawlah upate pual intihhlimna leh inzirtirna hman a ni a. Hmanpuitu Social Welfare minister chuan, nu leh pate an lo upata enkawl hna chu tu leh fate mawhphurhna a ni tih inzirtir thin leh chawinung hnam kan nih angin, upate chu anmahni awmhmun nghet ngeia upat lam hun hahdam leh hlim taka an pan theihnan MUP Branch tinin hmun remchang buatsaih tur leh chumi atana lo bengvarpui turin kalkhawmte a chah.
Sawrkar laipui pawhin upate inkawm khawmna tur ‘senior citizens day care center’ siam a ngaihpawimawh a, an hriselna leh thil dang danga upate hamthatna ngaihtuah pui zel a tum tih minister hian a sawi a. Upate enkawltu tur geratric caregivers pawh thahnem tak training pek an ni tawh tih sawiin, hrisel taka rei tak dam thei tura inenkawl that chu upate pawhin ngaipawimawh turin a chah bawk.
MUP Gen. Hqrs. president Nghaklianmawia kaihhruaia hun hmanah hian upate tana thil pawimawh leh tangkai hrang hrang, awlsam taka taksa sawizawi dan, eitur hrisel buatsaih dan leh an hriselna atana hriat tur pawimawh dangte mithiamten an zirtir a. MUP branch 18 leh Mizo Upa Pawl (Lunglei Gen Hqrs) branch 4 hnenah an inkawmhlimna hmun tih phuisuina atan Rs. 50000 theuh hlan an ni.