Fertilizer luh dan chhuichian an phut

Fertilizer luh dan chhuichian an phut
Mizoram kaltlanga Burma rama fertilizer lakluh chu dan lo a ni, tiin, chhuichiang a, thil awm dan dik tak mipui hriattir turin sawrkar an phut tih Congress Thalai chuan an sawi.
Congress Thalai Hqrs. thuchhuak chuan, Mizoram Fertilizer Dealers Association-in 2024 June-a fertilizer supply allotment an hmuh bak Mizoram sawrkar hnen atangin allotment an hmu tawh loa, an hriatpui loh leh dan loin rel hmangin fertilizer tam tham tak a lo lut niin a sawi.
Challan awm lo leh Agriculture department atanga allotment tel loin Zorinpui (Zochachhuah) a dah tur fertilizer hi rel hmangin a rawn thleng niin a sawi a. He thilah hian chief minister hming sawilan a tam hle tih sawiin, chief minister emaw a changtu minister-in emaw sawifiah turin an phut tih a sawi a ni.
‘Fertilizer hi India ramah control item a ni a. Central hriatpui lohin international boundary a pel thei lo. Sawrkar laipui hnen atangin urea hi Burma ramah thawn lut tur hian lehkha pawimawh phawrh tur an neih ngei ngei a ngai. Hei bakah Mizoram-in urea kan hmuh /lak ber chu BVFCL (bag hring) leh IFFCO (bag eng) an ni ber a, tuna rel rawn phurh thlen chu bag var (white) niin, a pawnah inziak a awm loa, bag 10000 vel nia an hriat thu Congress Thalai hian an sawi a ni.
‘Eng branding mah awm lo, methamphetamine leh heroin tawlhruk nen inang renga ngaih theih, sawrkar department hnuaia dealer-te hriattpuina tel lo a ni lehzel hian ngaih a ti tha lo a. Control item a nih avanga Burma rama lut thei lo Sairang Rel Station-a dan loa urea rawn thleng hi thil ngaimawhawm tak a ni,’ a ti.