MusiCares’ 2024 Person of the Year Jon Bon Jovi

Jon Bon Jovi chu 2024 MusiCares Person of the Year chawimawina hlan a ni dawn a, New Jersey khawchhuak zinga he chawimawina dawng thei pahnihna a ni ang. New Jersey khawchhuak, Bruce Springsteen-a’n 2013 khan a lo dawng tawh bawk a ni.
He chawimawina hi February ni 2, 2024-a Los Angeles Convention Center a event neihah an hlan dawn a, 66th annual Grammy Awards sem hma zan hnihnaah he event hi an nei dawn a ni.
Rimawi khawvela a hlawhtlinna bakah Jon Bon Jovi hi midangte tana a inpekna lamah pawh hriat a hlawh hle a, 2006 khan Jon Bon Jovi Soul Foundation dinin, hmun hrang hrang chenna tur in nei lo te tan hma an lak bakah retheihna um bo tuma hma latu pawl niin, chaw kaw puar ei tur nei lo te hnenah eitur an sem bawk thin a ni.
Jon Bon Jovi chuan thuchhuah siamin, “MusiCares chawimawina dawng tur ka ni hi phu lo ka inti hle mai,” a ti a, midangte tana inhman chu a nuna a kila lung pawimawh pakhat a nih thu sawiin, “Midangte tanpui hi mahni intanpui ang tho kan ni tih hi ka hrechiang a ni,” a ti bawk.
Jon Bon Jovi hi kum 61 a tling tawh a, 2007-a kum 57 mi ni a he chawimawina dawngtu Don Henley tih lohah chuan he chawimawina dawng thei naupang ber a la ni a, band la ding lai member zinga a mimal anga dawng hmasa ber a ni dawn bawk a ni.
An band Bon Jovi pawh hi 2018 khan Rock and Roll Hall of Fame-ah lak luh an ni tawh a, Billboard 200 (albums) chart-a No.1 kai thei album paruk nei tawhin, Billboard Hot 100 (singles) chart-a No.1 kai thei hla pali an nei tawh a, Grammy Award pakhat an dawng tawh bawk a ni.