Muslim firfiak lakah Germany inralring

Ruahman lawk angin nizanah Euro 2024 an tan a, a thlengtu Germany leh Scotland inkhel result tarlan hman a nih loh avangin European Championship vuakveta venhimna an kalpui dan chungchang hi thlir lawk ila.
Islamic State telin Islamist firfiak pawl thenkhatin Europe football inkhawmpui lianber hi tihbuai an tum thu an puang tawh a, hei vang hian opening ceremony leh tournament bultanna inkhel phei kha chu uluk lehzuala ven a ni.
Germany chuan an ram chhung khawpui 10-a stadium chhung luta inkhel entute chu mi maktaduai 2.7 tling turin an chhut a, stadium pawn chhehvel fan zone tina inkhel entute phei chu mi maktaduai 12 tling turin an ngai hial a; Berlin khawpuia an kawtkai hmingthang Brandenburg Gate leh a chhehvelah phei chuan football fans an tam zual dawn a, chu’ng mite himna chu an ngaihpawimawh ber a nih thu Interior Minister Nancy Faeser chuan a sawi.
Germany hian an ram chhunga venhimna hna thawktute mai bakah Europe ram dangte atangin puitu police officer an beisei a, venhimna pui tura inpe theite chu an welcome reng thu sawiin, Faeser chuan opening ceremony-ah khan foreign police officer 350 vel an mikhual thu a sawi.
Minister chuan Islamist terrorism bakah football-a buaina siam ching hooligan-te chetna bakah nitina an ream chhunga suahsual bawlna thleng ve hrim hrim piahlamah tuntum tournament-ah hian cyber attack thlenga an inven a ngaih thu a tarlang tel.
Germany-in 2006 World Cup a thlen tum khan fan zone hranghrang kha a lar hle a, kumin hian Europe chhung Ukraine maiah indona a la kal mek a, Middle East an buai mup mup reng bawk a, tah hian Germany sawrkar chuan tanpuina leh chhawmdawlnate a pechhuak ve reng a, an puih loh lamte hian pawikhawih an chak zek zek dawn a, he’ngte avang hian fan zone-a punkhawm pawh hi kum 2006 ai khan an tim deuh zawk ang em tih ngaihdan awm mah se maktaduai 12 vel chu chhuakkhawm tura beisei an la ni tho tho!
Hei vang hian Germany sawrkar a fimkhur a, venhimna pawh a uluk a, an Interior Minister chuan mi tute’n emaw an ram chhunga buaina leh indona kaihluh an tum dawn avangin German kawtthlerah reng reng buaina leh inhuatna chawktho thei (propaganda leh hate speech) lam chi reng reng tihlan an remti dawn lo tih a sawi a, chuti ang thawm chu an enliam mai mai dawn lo tiin vaukhanna a chhakchhuak nghal.
Tournament chhung hian nitin police officer 22,000 chuangin venhim hna hi an thawk kal reng dawn a ni.
German security buaipuitute chuan hlauhawm thleng thei hriat zung zungna kawngah international huapa an thawhpuite pawh an bepawp reng a, ramri venhimna lam an uluk hle bawk.