Myanmar-ah Chanchin |ha Dak rah chhuah Kohhran
Myanmar-ah Presbyterian Kohhran a awm a, Synod 10 inzawmkhawmna Presbyterian Church of Myanmar (PCM) a ding. PCM hi Mizoram hrin tiin a sawi theih.
“Mizoram hi kan Jerusalem a ni a, Mizoram Presbyterian Kohhran hi keini PCM chuan nu leh pa angah kan ngai a ni,” PCM moderator Rev Lalrivunga chuan a ti.
Mizoram mipuiin Chanchin |ha Dak hmanga rawng an bawlna khan Myanmar-ah kawng hrang hrangin rah a chhuah a, Presbyterian Kohhran pawh hi chumi rah chhuah chu niin, February ni 6, 1956-ah Losau khuaah an din a ni.
Tunah hian Synod 10 an awm a, Phai Synod, Lairam Synod, Chin Synod, Falam Synod, Tedim Synod, Zou Synod, Hakha Synod, Maturam Synod, Victoria Synod leh Dairam Synod te an ni a, PCM-ah inzawmkhawmin Tahan-ah hmunpui an nei.
“Chanchin |ha Dak rah kha kan ni a, Mizoram atanga harhna thlengin min hring a, Mizorama Presbyterian Kohhran kal dan tha kan ti a, kan entawn a,” Rev Lalrivunga chuan a ti.
Thu leh hla lamah Mizoram Synod chu vawiin thlengin an rinrawl a nih thu a sawi a, Synod hrang hrangin Mizoram Synod lehkhabu leh chanchinbu buatsaihte an chhiar bakah Sunday School zirlai bute pawh an lo hman ve thu te a sawi a, Duhlian tawng hmanna Synod, a bikin Phai Synod phei chuan Naupang leh Puitling Sunday School zirlai bu a vaia an lo hman ve thu te a sawi.
Mizoram Synod-in lehkhabu leh zirlai bu bakah kohhran chanchinbu hrang hrangte pawh a thawn a, Kristian Hla Bu pawh an lo hmang ve tih te a sawi a, kumin May thlaah Mizoram Synod nen thawh dunna thuthlung an ziah thu leh hma an sawn zel an beisei thu te a sawi bawk.
Myanmar-a Synod hrang hrangte hi Zo hnahthlak vek niin, tawng hrang hmang an ni a, Synod tinah hian mahni tawngin Bible an nei theuh.
Zo hnahthlakte zingah kohhran pawl hrang hrang an awm a, Rev Lalrivunga chuan, “Zo hnahthlakah Kristian ni lo an awm kan hre lo,” a ti.
Chanchin |ha Dak hmanga Mizoram kohhran mipuite rawngbawlna rah, Myanmar-a Presbyterian Kohhran hi a din tirh atangin Mizoram Synod-in a theih ang angin a enkawl a, 1959-1969 chhung pawh khan Mizoram Synod tirhin Rev Lalthanga’n a lo thut chilh tawh thin.
Tunlaiin Myanmar an buai a, kohhranhote pawh a hma angin an inkhawm thei lo; Chawlhni chawhmaah Sunday School an kal a, chawhnu lamah thalai, nuho leh paho an inkhawm thin.