Myanmar-ah emergency hlip, December-ah inthlan tum

Myanmar-ah emergency hlip, December-ah inthlan tum
Myanmar-a sipai sorkar chuan kum li leh a chanve liam taa thuneihna an chan atanga emergency an puan chu Ningani khan an hlip ta a, kumin kum tawp lama inthlan huaihawt turin an inbuatsaih.
Inthlan hi sipai sorkar duh lotute nena an inbeihna nasa tak karah December engtik ni berah emaw an huaihawt rin a ni a, inthlanna felfai leh thianghlim a nih erawh beisei lawk a ni lem lo.
Sipai sorkar inrelbawlna an siksawi nghal a, hetah hian an hotupa ber, Senior Gen. Min Aung Hlaing-a chuan chanvo pahnih a hlip a; mahse, an sorkara thuneihna lian tak takah erawh chanvo a la nei.
Sipaite hian February 1, 2021-a mipui thlan, Aung San Suu Kyi-i kaihhruai sorkar paih thlain National League for Democracy (NLD) party hruaitu eng emaw zat man nghalin sorkar thar an din a, emergency an puang zui a. Sorkar paih thlak chhanah hian kum 2020-a inthlan kha a dik lo nasa hle niin an sawi a, chhuitute erawh chuan chutiang a awm lo niin an sawi.
Emergency hnuaiah hian sipaiten sorkar kal vel zawng zawng an kutah dahin ram dan siam, court rorelna leh thupek siam zawng zawng chu State Administration Council an tih thin, military council-a hotu, Min Aung Hlaing kutah a awm vek a ni.
Council hi thiah tawh niin prime minister nihna pawh a advisor, Gen. Nyo Saw-a kutah a hlan a; mahse, Min Aung Hlaing-a hi president lailawk anga la awmin thuneihna a la nei vek a ni.
Sipai thupuangtu, Maj. Gen. Zaw Min Tun-a chuan emergency chu Ningani zanlai atanga tawpin inthlang turin an inbuatsaih nghal dawn tih a sawi a. “Thla ruk chhungin kan inthlang ang,” a ti.
Sipaiten thuneihna an chan hnuah inawpna atan State Administration Council kha din a ni a, thiah a nih thu leh tunah chuan sorkar thil chu National Defense & Security Council kutah a awm vek tawh thu Zaw Min Tun-a chuan a sawi.
National Defense & Security Council hi a thupung chuan dan anga sorkar roreltu ni mah se sipai thunun tho a ni a. President nihna chelh lailawktu, Min Aung Hlaing-a pawh member a la ni tho.
Sorkar enkawl, MRTV television chuan National Defense & Security Council hian an hnuaiah State Security & Peace Commission a din tih a puang a; mahse, hetah pawh hian Min Aung Hlaing-a hi an hotu ber a ni tho.
Kum 2021-a sipaiten thuneihna an chan hlim khan mipuiin duh lohna an lantir a, a tirah muanawm tak ni mah se venhim hna thawktuten tharum nen an bei let a, ralthuam keng chhuah phahin tun thlengin tual chhung indona a awm phah.
Ni laini thleng khan venhim hna thawktute hian mi 7,013 that tawhin mi 29,471 an man tawh niin Assistance Association for Political Prisoners chuan a sawi a, sipai sorkar hian a dik lo an ti thung.
Ralthuam nena bei lettu an tam avangin sipaite hian tunah hian an ram zahve pawh an thunun tawh lo niin mi thiamte chuan an ngai a; mahse, an la thunun lai hi an ram laili, an khawpui ber, Naypyidaw hnaih a ni a. Anmahni beitute chet lak theih lohna lai a ni.
Sipaite hian a tirah chuan August, 2023-ah inthlan turin an ti a, pawt hla zetin tunah hian a ni sawi lovin kumin December an ti ta a ni.
Mi thenkhat chuan inthlan hi buatsaih mah se chanchinbu a zalen lo va, Suu Kyi-i party hruaitu tam tak man an nih bawk avangin engmah awmzia awm chuang lo tur, an rorelna sawh nghehna tur mai niin an ngai.