Myanmar-ah Zo hnahthlakte an raltlan

Myanmar atangin hmun dangah Zo hnahthlakte an raltlan a, chutih laiin hmun danga Zo hnahthlak thenkhat chu Myanmar-ah hian an raltlan mek ve thung.Myanmar-a Samang khuaah tunlaiin Bangladesh-a Chittagong Hill Tracts atangin Zo hnahthlakte an raltlan a, mi 200 dawn an ni tawh nia hriat a ni.
Chittagong Hill Tracts-ah hian Zo hnahthlakte tana beitu Kuki-Chin National Army te leh Bangladesh sorkar sipaite an inbei a, hei vang hian nikum kum tawp lam atang khan Zo hnahthlak engemaw zat chu Mizoramah an lo raltlan tawh. An sahimna zawnga tlanchhuak thenkhat chuan Myanmar an thleng a, Myanmar-a Samang khuaah hian mi 196 an lut tawh tih thu dawn a ni.
Samang hi Mizoram chhim tawp hnaiha awm a ni a, Mizoram leh Bangladesh an hnaih ve ve. Mizoram state chhim tawpa Zorinpui dawt leh khua, Myanmar chin chiah chiaha awm a ni.
Samang-ah hian raltlan hi chhungkaw 43 vel, an vaiin mi 196 vel an awm mek a, a thleng hmasate chu thla hnih vel an awm tawh. Chawlhkar liam taah khan chhungkaw nga vel an lut leh a, anni hi a thleng hnuhnung ber nia hriat an ni.
Samang hi Bawm khua a ni a, chhungkaw 33 vel an awm. Anmahni aia tam mikhual an nei a, raltlan thenkhat chu mahni chenna tur in sain an awm nghet viau tawh. In ruak remchang luah an awm a, mi ina thleng an awm bawk. A tam ber chu sikul leh hall velah an awm nia hriat a ni.
He khuaa raltlante hi he khuaa tlanluh tum ve reng an ni lo nia hriat a ni a, thu dawn danin, Mizorama tlanluh tum, mahse BSF an duty ngawrh avanga Samang pan ta vek an ni. Samang an pan kawngah Mizoram an lut em tih erawh hriat a ni lo.